Shillong, Rymphang 06
Ka tnat Development of North Eastern Region (DoNER) ka la pynlong ïa ka North East Trade and Investment Road show ha Chennai ha ka Sngi Balang. Ka road show ka la ktik ïa ki jingmut jingpyrkhat jong ki nongbei tyngka kiba la kloi ban peit ïa ki lad kiba don ha ki jylla ka thaiñ shatei lam-mihngi. Ha kane ka prokram la wan ïashim bynta u Myntri Sorkar Pdeng ba dei khmih ïa ka tnat DoNER bad ka tnat Communications, Jyotiraditya M Scindia ha ryngkat u Pu Lalnghinglova Hmar, Myntri ka Sorkar Mizoram, ki ophisar na ka tnat DoNER, North Eastern Council bad ki jylla ka thaiñ shatei lam-mihngi.
U Myntri ka tnat DoNER u la ong ba u Myntri Rangbahduh u la ong ba ka thaiñ shatei lam-mihngi ka dei ka Asthalakshmi jong ka India, ka jingdon jingem kaba kongsan kaba la khreh ïa ka jingwan ki karkhana. U la kdew sha ki sienjam na ka bynta ka jingpynbiang ïa ki jingdon jingem kiba la wan ha ka thaiñ shatei lam-mihngi hapoh ka jingïalam jong u Modi ha kine ki 10 snem ba la dep, kiba kynthup ka jingpynïar ïa ka jingïasoh lyngba ki liengsuiñ, ki surok bad ki rel, ki lad ka leit ka wan lyngba ki jaka shong um. U Myntri u la ong ba man ki phra tylli ki jylla ha ka thaiñ shatei lam-mihngi ki don la ki jong ki jingkhlaiñ, ki jingdon jingem bad ki lad bad kumta kane ka thaiñ ka long ka bynta kaba kongsan ha ka roi ka par jong ka India. Naduh ka jingïar jong ka deiriti haduh ka jingitynnad bad ka jingdon ha ka jaka kaba kongsan, ka thaiñ shatei lam-mihngi ka don shibun ki lad ban long kawei na ki bor kiba khlaiñ jong ka ri ha ka ïoh ka kot.
Ka jingjan jong ka ïa ka Southeast Asia ka pynlong ruh ïa ka thaiñ shatei lam-mihngi kum ka khyrdop sha ki ri ka South East Asia, kaba ïahap bha bad ka Act East Policy jong ka India. U la kdew ruh sha ki lad jong ki jylla ka thaiñ ha ki kam bapher bapher kum ka kam jngohkai bad ka kam ai jaka sah ïa ki nongleit nongwan, ka kam rep bad ki kam kiba ïadei bad ka kam rep, ka kam ai jingsumar, ki kam pynbyrngia bad ki kam ïalehkai, ki jingdon jingem bad ka kam logistic, IT bad ITeS, ki kam jaiñ, ki kam thaiñ jaiñ bad kam shna tiar, ka bording bad kiwei kiwei.
U la kular ïa ki nongbei tyngka ba ki samla jong ka thaiñ, ka jingnang jingstad, bad ki jingdon jingem kiba bun ki pynlong ba kane ka jaka ka dei kaba biang bha ban bei tyngka. U Myntri u la ong ba u itynnad bha ïa ka Chennai, bad u la ong ba kane ka dei ka jaka kaba khlaiñ ha ka kam IT bad ka jaka pdeng jong ka jingkiew ka ïoh ka kot jong ka India. U la ïaroh ïa ka hiar pateng ha kane ka nongbah, ka teknoloji bad ki kam karkhana kiba khlaiñ bad u la pynïasyriem ïa ki lad ha Chennai bad ki lad jong ka thaiñ shatei lam-mihngi ha ka ïoh ka kot.
Da kaba kdew sha ka bor jong ka thaiñ shatei lam-mihngi ha ka kam rep, ka kam pynmih jingbam, ka kam jngohkai, bad ka kam shna jingshna, u la kyntu ïa ki nongseng kam lajong na Chennai ba kin bei tyngka ha kine ki kam. U la ong ruh ba ka thaiñ shatei lam-mihngi ka don 38% ki siej kaba plie ïa ka lad kaba heh ïa ki kam shna jingshna jong ka Chennai. Shuh shuh ki hydrocarbon bad ki lad pynmih bording ha ka thaiñ shatei lam-mihngi ki ap ban shah pyndonkam. Ha kaba pynkut ïa ka jingai jingkren, u la khot ïa ki nongbei tyngka sha ka thaiñ shatei lam-mihngi ba kin don ka bynta kaba heh ha ka jingtei ïa ka lawei jong kane ka thaiñ.
