Shillong, Rymphang 06
Ka Shillong Lajong FC kan pynkhreh ïa ka jingïalehkai ha la ïing pyrshah ïa ka kynhun kaba khlaiñ bor na Punjab, ka Namdhari ha ka Sngi Saitjaiñ ha kane ka nongbah.
Kane ka jingïakhun I-League kan long ha SSA Stadium kaba ha First Ground, Polo ha ka por 7 baje mynmiet.
Te kumta kane ka klob ka la pynbna ba kan die ïa ki tiket I-League naduh ka Sngi Thohdieng ha ki jaka ba la buh kata ha Electronic Centre (Police Bazaar) & Cafe Shillong (Laitumkhrah). Katba ha ka Sngi Saitjaiñ yn die ha SSA Stadium Ticket Counter.
Lah ban kdew ha ka jingïakhun shabar na la ïing kaba la long ha ka 25 tarik u Kyllalyngkot, ka Lajong ka la mad ïa ka jingshah rem ha ka Namdhari haduh 5-2 kol. Te kumta kane ka kynhun hapoh ka jingïalam u Jose Carlos Rodriguez Hevia ka la khmih lynti ban wanphai da ka jingjop ha kane ka jingïakhun ha la ïing.
Kumba ka paw ka Namdhari ka dei ka kynhun kaba la lamkhmat ha kane ka lympung ryngkat 24 poiñ na ki khatar sien ïakhun hadien ba la tam da shi poiñ ïa ka Churchill Brothers, katba ka Lajong ka la don ha ka kyrdan ba hynñiew ryngkat 16 poiñ.
