Shillong, Rymphang 06
Ka NorthEast United FC kan ïakhun pyrshah ïa ka Mumbai City FC ha ka lympung ïalehkai Indian Super League (ISL) ha ka Sngi Thohdieng ha Jawaharlal Nehru kaba ha Polo, Shillong ha ka por 7:30 mynmiet.
Kane ka dei ka sien kaba nyngkong eh ba ka NEUFC ka la wanrah ïa ki lai tylli ki jingïalehkai ha la ïing sha kane ka nongbah.
Ka Mumbai ka la khmih lynti ban ïakhun tyngeh hadien ba ka la ïakhaid khlem don ba thep kol pyrshah ïa ka East Bengal FC ha ka jingïalehkai ba la dep, katba ka NEUFC ka la thmu ban pynjlan ïa ka jingïalehkai kaba khlem shah rem ha ki khyndai sien ïakhun.
Ha ka jingïakhun shabar na ïing ka NorthEast United ka la lah ban pynliem da 3-0 kol bad ka la khmih lynti ban wanphai biang da ka jingjop ha kane ka jingïakhun ha la ïing.
Kumba ka long mynta ka NorthEast United FC ka la don ha ka kyrdan basaw ryngkat 29 poiñ na ki 19 sien ïakhun. Katba ka Mumbai ka la don ha ka kyrdan ba khynriew ryngkat 28 poiñ.
Kiwei pat ki jingïalehkai jong ka NEUFC ki ban long biang ha kane ka nongbah kin long pyrshah ïa ka Bengaluru FC ha ka 21 tarik bad ïa ka East Bengal FC ha ka 8 tarik u Lber.
