Livingston, Rymphang:
Ki bor ka aiñ jong ka Texas ha ka Sngi Balang ki la pynkut noh ia ka jingim jong uwei u runar da kaba ai ia ka tika pyniap briew hadien ba la rai pyniap ia u namar ka jingdonkti ban pyniap ia uwei u Pastor ha u snem 2011 ha kaba mynshwa u la kyntait ba um shym la don kti eiei ha katei ka jingjia.
U Steven Nelson, 37 snem ka rta, u la pynlut palat shiphew snem ka jingim ha patok ba la set ia u naduh ba la pharep bad pynngat kyndon ia u ha kitei ki snem hadien ba la shem ia ka jingdonkti jong u ban pyniap ia u Clint Dobson, 28 snem ka rta, ha ka por ba u la leit ban lute ia ka Balang North Pointe Baptist ha Arlington, hajan Dallas.
Kumta, ki bor pyniaid ha ka por kumba 6:50 jong ka janmiet Sngi Balang, ki la pynkut jubor noh ia ka jingim jong utei u runar da kaba pyndonkam da kitei ki jait tika ki ban shu pyn iohthiah bad pyniap syndon ia u briew.
Dang ha kine ki khyndiat por ba la leit, ki nongthoh khubor ki la ioh ban iakren markhmat bad u Nelson hapoh ka patok ba la set ia u ha Livingston, ka shnong kaba jngai kumba 75 mer lane kumba 120 kilometre na ka phang Shathie jong ka Houston, ha kaba u dang ap ia katei ka jingshah pynshitom jong u kiba iadei katkum ka jing- pynkheiñ aiñ jong u hi.
