Shillong, Rymphang 06
Ka Inningstars Xl bad ka Shillong Sixers ki la lah pynthikna ban jam sha ka quarter final ha ka Third Division Shillong Cricket League 2024-25 hadien ba ki la ïoh jingjop ha ka Sngi Palei.
Ha kane ka jingïakhun pre-quarter final kaba nyngkong, ka Inningstars XI ka la pynliem noh ïa United Brothers da 43 run. Ka Inningstars Xl ka la shimti ban tied nyngkong ha kaba ka la ïoh 154 run bad shah pynhap 10 wiket ha ki 19.4 over. U Faruq Hussian u la tied 32 run na ki 28 bol bad u Gopal Singh u la ïoh 27 run na ki 13 bol. Katba u Rohit Singh u la shim 3 wiket bad 2 wiket da u Ramesh Sahani.
Haba wan beh ïa ka thong ba la buh da ka liang pyrshah, ka United Brothers ka la ïoh tang 111 run bad shah pynhap 10 wiket ha ki 18.2 over. U Ganesh Sunar u la tied 35 run na ki 18 bol bad u Pollok Modak u la ïoh 22 run na ki 23 bol. Katba u Sumit Narzary u la shim 3 wiket bad 2 wiket da u Jitender Rai. Ïa ka nam Player of the Match la ïohpdiang da u Sumit Narzary.
Haba phai sha kawei pat ka jingïakhun, ka Shillong Sixers ka la jop da 4 run ïa ka Turshaphrang. Ka Shillong Sixers kaba la tied nyngkong ka la ïoh 161 run bad shah pynhap 10 wiket ha ki 20 over. U Sandeep Roy u la tied 55 run na ki 31 bol bad u Evert Mawlong u la ïoh 32 run na ki 16 bol. Katba u Ruddystar bad u Ïohbor Shadap ki la shim mar 2 wiket.
Haba wan beh ïa ka thong, ka Turshaphrang ka la ïoh tang 157 run bad shah pynhap 8 wiket ha ki 20 over. U Ruddystar u la tied 37 run na ki 26 bol bad u Erich M Lyngdoh u la ïoh 26 run na ki 22 bol. Katba u Meinam Amit Singh u la shim 4 wiket bad 2 wiket da u Sumeet Gurung. Ïa ka nam Player of the Match la ïohpdiang da u Meinam Amit Singh.
