Shillong, Rymphang 06
Khatduh ïawai ka Jylla ka la khur sa ka takma ksiar kaba nyngkong eh lem bad kawei ka takma rupa ha ka 38th National Games 2025 kaba la long ha Uttarakhand.
Ha kane ka jingïakob king-lieng jong ka Extreme Slalom (Kayak Cross) kaba hap hapoh ka Meghalaya Canoe Association kaba la long ha ka Sngi Palei, u Vikash Rana u la khur ïa ka takma ksiar ha ka liang ki shynrang bad ïa ka takma rupa la khur da ka Elizabeth Vincent ha ka liang ki kynthei.
Kine ki nongking-lieng ki dei na Umtham kaba don ha Umsning, Ri Bhoi District bad kiba la ïoh ka jingshah hikai ha ki shikurim kata u Ian Stuart Vincent uba na Australia bad ka Sheila Vincent. Ka Elizabeth ka dei ruh ka khun kynthei jong kine shikurim.
Haba kheiñ lang baroh, ka Jylla ka la khur haduh 6 tylli ki takma; kine ki kynthup ïa san tylli na ka Meghalaya Canoe Association kaba mut kawei ka takma ksiar, ar ki takma rupa bad kawei ka takma rnong, katba ïa kawei pat ka takma rnong la khur da ar ngut ki nongking-lieng kiba hapoh ka Rowing Association ha ka Women Double Scull Competition.
Na ka liang ka Meghalaya State Olympic Association (MSOA) sa shisien pat kam lah khlem da ai khublei kyrpang ïa kitei shikurim kiba la trei shitom ha kaba jar-jar na ka bynta ban sei ïa ki khynnah kiba don ïa ka sap king-lieng na ka thaiñ Ri Bhoi.
Kitei shikurim ki dei ruh ki nongseng ïa ka Meghalaya Canoe Association bad tang hapoh ki ar snem naduh ba la seng ïa ka ha u snem 2023, ki la lah ban sei ïa ki nongking-lieng kiba kynsai ban ïada ïa ka burom kaba khraw jong ka Jylla hi baroh kawei.
Kumba ka paw ka Jylla ka la phah shim bynta haduh 41 ngut ki nongïalehkai ha ki khyndai tylli ki jait jingïalehkai kiba kynthup ïa ka Shooting (7), Athletics (1), Judo (2), Archery (1), Rowing (17), Wushu (2), Aquatics (4), Canoeing & Kayaking (4)bad Boxing (3), hynrei tang hynñiew ngut kiba la lah ban wanrah burom ïa ka Jylla.
“Ngi ai khublei ïa u Ian bad ka Sheila Vincent kiba la trei shitom na ka bynta ban kyntiew ïa ki khynnah kiba don ïa ka sap ba kyrpang ha ka ban king-lieng. Kane ka synjuk la la phah tang saw ngut ki nongïalehkai, hynrei kaba phylla ka long baroh saw ngut ki la lah ban wanrah burom ïa ka Jylla da kaba khur kawei ka takma ksiar, ar ki rupa bad kawei ka takma rnong,” la pynpaw kat kum ka kyrwoh kaba la wan lyngba u General Secretary ka MSOA, Bah Finely Lad Pariat.
“Ym don kyntien ha ka dohnud bad ka jingmut jingpyrkhat jong nga ban pynpaw katno nga sngewnguh ïa ki namar ba ki la pynlong ïa ka Jylla jong ngi kaba sngewsarong, ngi sngewkmen ïa ka jingjop jong phi bad nga duwai ha U Blei ba un ïai bteng ban pynsleh ïa phi baroh ar ngut da ki jingkyrkhu jong u ïa ka jingkoit jingkhiah, ka jingkmen bad ban ïai trei shitom ban pynmih bun shuh-shuh ki nongïalehkai kiba kynsai kiba la lah ban paw hapoh ka ri bad wat shabar ri kumjuh.”
“Nga ai khublei ruh ïa u Myntri Rangbah ka Jylla u Conrad K. Sangma, kumjuh u Myntri ka tnat ïalehkai u Bah Shakliar Warjri, u Commissioner ka tnat ïalehkai u Dr. Vijay Kumar lem bad ka tnat ïalehkai hi baroh kawei kiba la ai jingkyrshan pura na ka bynta ka kynhun hi baroh kawei,” u la bynrap.
