Shillong, Rymphang 07:
U kyrtong shimet uba dei ruh u MDC ba mynta ka Mawlai konstitwensi, Bah Teiborlang Pathaw u la ther ïa kiba kynthoh halor ka jingieh kam jong u na ka seng NPP bad kum u executive member hapoh ka executive committee ha district council.
“Nga long uba kloi ban phah ka jingpynshai lada phi ai ïa ka ‘address’ jong phi khnang ba ngan ïoh phah ïa kane ka shithi kaba nga la ‘resign’ na ka NPP, kane ka pyni shai ba ka la kut ka jingïadei lok ka jong nga bad ka seng NPP ha kane ka kynti ba mynta”, la ong u Bah Pathaw da kaba sei syndon ïa ka shithi iehnoh haba kren ha ka jingïa-lang ‘Common Platform’ ha Mawlai Kyntonmassar ha ka Sngi Thohdieng.
“Lada phim pat tip bha ïa ka jingshisha ynnai wan jler hapoh ka shnong Mawlai jong ngi, phi dei ban da wad jingtip shwa namar ka rai ba ngan ïakhun kum u kyrtong shimet kam dei ban pynsngewbha ïano-ïano ruh, hynrei ka dei kaba u paidbah u kwah ïa nga ban ïakhun”, u la ong.
U Bah Pathaw u la ong ba dei u paidbah uba pynshong ne pynïeng ïa u bad ka kam jong u ka long tang ban ai ka jingshakri sha u paidbah ym ïa ka seng lane ïano-ïano.
Haba kynthoh ïa ka jingkynnoh jong u Nongïalam ka VPP uba la ong ba ki don nongïakhun ilekshon kiba wan sha ki paidbah ban wanrah ïa ka roi ka par ïa uta dei ban beh, u Bah Pathaw u la ong, “Kaba sngewsih ka long ba ki ïakhun kat ïa ka ilekshon kim tip ba wat lada kim don ïa ka skhim, hynrei ka jingïarap na ka sorkar kmie ka don na ka bynta ban pyntyllun ïa ki kam pynroi ha shnong ha thaw”.
Haba pan ïa ka jingkyrshan ha kane ka ilekshon MDC, u Bah Pathaw u la ong ba lada ki paidbah ka Mawlai ki dang ibit ïa u ban long kum u MDC un trei kham bha shuh-shuh na ka bynta ka shnong Mawlai.
“Ngan leit biang sha Ïingdorbar Thaw Aiñ ba ngan thaw ïa ki aiñ ki ban ïada ïa ka ri bad ka jaidbynriew”, la ong u MDC.
