Shillong, Rymphang 07
Ka Shillong Lajong FC ka long ba la khreh ban ïakhun pyrshah ïa ka kynhun ïalehkai ba khlaiñ bor na Punjab, ka Namdhari ha ka lympung I-League ha ka Sngi Saitjaiñ ha SSA Stadium, Polo ha ka por 7 baje mynmiet.
Ha kane ka jingïa-khun ka Namdhari ka la khmih lynti ban ïakhun tyngeh khnang ban ïai bteng ban bat ïa ka kyrdan ba hakhlieh ha kane ka lympung namar kumba long mynta kane ka kynhun ka la hiar noh sha ka kyrdan ba-ar hadien ba ka Churchill Bro-ther ka la lah ban pynliem ïa ka Gokulam Kerala da 2-1 kol ha ka Sngi Thohdieng.
Katba ka Shillong Lajong ka donkam ban ïoh lai point khnang ba kan nang lah ban jam sha ki kyrdan ba kham shakhmat. Kumba ka long mynta kane ka kynhun ïalehkai na ka nongbah hapoh ka jingïalam u Jose Carlos Rodriguez Hevia ka la don ha ka kyrdan ba hynñiew ryngkat 16 point na ki khatar sien ïakhun.
