Itanagar, Rymphang:
Ka Arunachal Pradesh Youth Congress (APYC) ka la ïasoh bad ka jingïakhih jong ka Indian Youth Congress ha baroh kawei ka ri ban dawa ïa ka jing-kitkhlieh kaba kham bun na ka bynta ki samla kiba khlem kam khlem jam jong ka ri, da kaba pynlong ïa ka jingïakhih ha shlem treikam jong ka ha ka 6 tarik, Rymphang.
U President ka APYC, u Tarh Johny haba ai jingkren u la ban jur halor ka jingeh kaba nang kiew ha ka jingbym donkam donjam bad u la kynthoh ïa ka mang tyngka jong ka sorkar pdeng namar ba kam shym la lah ban weng ïa kane ka mat.”Ki samla ki la don ka jingkyrmen kaba khraw na ka mang tyngka halor ka jingthaw kam thaw jam hynrei ki la shah iehnoh beiñ sa shisien pat,” u la kynnoh.
U Johny u la kynnoh ruh ïa u Myntri Rangbahduh ka ri u Narendra Modi ba um shym la lah ban pynurlong ïa ka jingkular jong u ha u snem 2014 ban thaw kam ar klur man la u snem.
U nongïalam ka APYC u la kynnoh ba hapoh ka sorkar NDA, ka jingbym donkam ka la poi sha ka kyrdan kaba shyrkhei. U la kynnoh ba katba ka sorkar ka dang pynbna ïa ki jingthmu thaw kam kiba thrang ha ki mang tyngka jong ka, hynrei ka jingshisha kaba ha tynrai ka dang sah kumjuh.
U Johny u la pynpaw ruh ïa ki jingsngewkhia halor ka jingma ha ka imlang-sahlang na ka jingbym donkam-donjam, da kaba pynpaw ba ka jingsngewsih hapdeng ki samla bym don kam don jam ka pynlong ïa ki ban dih ïa ki drok bad kiwei kiwei ki jingdih buaid.
Haba phai sha ka jylla Arunachal Pradesh, u la kdew ba bun ki samla ki nang kham ngop ha ki kam khaïi drok, ka jinglong kaba u la pynshong nongrim shibun eh ha ka jingbym don ki lad kamai.
“Ka long kaba sngew shyrkhei ban ïohi ba wat ki pulit ruh ki la shah kem ha ki kam khaïi drok. Hynrei ka sorkar jylla kam shym la lah ban shim ïa ki lad ki lynti kiba skhem ban khanglad ïa kum kane ka jingdonkti jong ki nongtrei sorkar,” u la kynnoh.
U Johny, u la ïaroh ïa ka jingkren jong u Rahul Gandhi, ha ka Parliament, kaba dang shen, ha kaba u ong, ba ka dei ka jingkren kaba pynpyrkhat bad kaba ai jingshemphang.
“U Gandhi u la buh ïa ki lad ki lynti kiba lah ban leh na ka bynta ka sorkar ban weng ïa ka jingkiew ha ka liang bym donkam-donjam, da kaba ai jingmut kiba bha tam kiba dei ban pynrung. Ka APYC ka ieng ha ka jingkyrshan kaba pura ïa kine ki jingmut bad ka dang ïai bteng ban dawa ïa ki lad kamai na ka bynta ka jingbun ki samla jong ngi kiba khlem kam,” u la bynrap.
