Imphal, Rymphang:
Ki bor pahara ha Manipur ki la trei borbah ha kaba ïadei bad ki jingïakhun pyrshah ïa ki kam runar ha kylleng ka jylla, da kaba pyllait im ïa ar ngut ki ‘riew paidbah kiba la shah rahbor bad kurup shibun ki jingdih pynbuaid bad ki tiar ïaleh ha ki kam runar kiba bun ha kane ka taïew.
Ha ka jingkhynra kaba nyngkong kaba la long ha ka 5 tarik, Rymphang, ki pulit ka Manipur da ka jingjop ki la lah ban pyllait im ïa arngut ki nongbylla kiba la shah rahbor na Assam – u Rintu Mina, 37 snem ka rta bad u Montu Sheikh, 20 snem ka rta – kiba la shah rahbor hajan ka Public Hospital ha Hatta. Ki pulit ki la ïoh ban kem ïa u briew uba la donkti ha ka kam rahbor ïa uba la tip kyrteng kum u Md. Anwar Hussain, 41 snem ka rta, na ka thaiñ Kairang-Heingang Khong.
Ha ka sngi kaba bud la sakhi ar tylli ki jingjia kurup drok kiba bun. Ha ka khyrdop Moreh No. 1, ki bor pahara ki la kem ïa u Zamkholun Baite, 40 snem ka rta ryngkat bad ki dawai kuli WIY kiba khia kumba 1.5 kilo.
Ha ka jingkhynra ba kyrpang ha Bishnupur distrik, ki shipai ki la ïoh kem ïa u Md. Tajuddin, 29 snem ka rta, ha kaba la lap ba u kit ïa u drok Brown Sugar ba don ïa ka jingkhia kaba 1,041 gram. Baroh ar ngut la kem ryngkat bad ki kali bad ki mobile phone.
Ka jingkhynra ïa ka jaka lum Wangoo Mameiching bad Nongyai Hill range ka la ïoh ïa ka jingbuh ïa ki tiar ïaleh kiba kongsan bha, kynthup ïa kawei ka Single Barrel Gun, kawei ka suloi SLR, ar tylli ki bom pynbthei kiba heh, ki tiar pynbthei ummat, bad ar tylli ki tiar pynbthei ba la shna hi kiba khia kumba 600 gram.
