Aizawl, Rymphang:
Hadien ba la pynpoi ïa ki shithi na ka Election Commission sha ar ngut ki Myntri ka Mizoram halor ka jingkynnoh ba ki la pynkheiñ ïa ka Model Code of Conduct (MCC), u Myntri ka tnat ïalehkai u Lalnghinglova Hmar u la kyntait halor ka jingkynnoh.
Lah ban kdew ba ka jingthep vote jong ka Village Council bad Local Council ka la dei ban long ha ka 12 tarik Rymphang.
Ka State Election Commission ka la ai ïa ki shithi sha u Hmar bad sha u Myntri ka tnad PWD u Vanlalhlana bad la bthah ba kin ai ïa ki jingpynshai hapoh ka 3 tarik, Rymphang hadien ba ka liang pyrshah ka Mizo National Front (MNF) ka la ujor da kaba kynnoh ba kine ar ngut ki Myntri ki pynkheiñ ïa ka MCC.
Ka MNF ka la kynnoh ba u Vanlalhlana u la pynkheiñ ïa ka kyndon jong ka MCC da kaba ïalap ilekshon hajan jong ka ophis Myntri jong u na ka bynta ki kyrtong jong ka seng Zoram People’s Movement (ZPM) ha Aizawl Durtlang Local Council kaba ïa ka durkhih la pynsaphriang ha ki Social Media.
