Shillong, Rymphang 07
Ka Lumpaïa Avengers ka la pynliem noh ïa ka Mawphlang CC da 29 run na ka bynta ban ïoh jingjop ha ka 4th District League T20 Cricket Tournament 2024 ba la pynïaid da ka East Khasi Hills Cricket Association ha ka Sngi Thohdieng.
Ha kane ka jingïakhun kaba la long ha Sohra, ka Lumpaïa Avengers ka la kam trai ban tied nyngkong ha kaba ka la ïoh 147 run bad shah pynkhyllem 7 wiket ha ki 20 over. U Aldy Mebandondor Nongbri u la tied 32 run na ki 27 bol. Katba u Mawlynnai Wahlang u la shim 2 wiket ha ki 4 over.
Haba wan beh ïa ka thong ba la buh da ka liang pyrshah, ki nongtied ka Mawphlang CC ki la shah pynkhyllem lut baroh na ka bynta ban ïoh tang 114 run ha ki 19.2 over. U Wandondor Jyrwa u la tied 40 run na ki 47 bol. Katba u Daryll Donald Nongbri u la shim 3 wiket ha ki 4 over bad ban ïohpdiang ruh ïa ka nam Player of the Match.
Haba phai sha kawei pat ka jingïakhun ba ar, ka Laitjem CC ka la jop da 126 run ïa ka Mawmluh CC. Ka Laitjem kaba la tied nyngkong, ka la ïoh 204 run bad shah pynkhyllem 5 wiket ha ki 20 over. U Merken B Kharkongor u la khyrwit ïa ka shiteng spah kaba 52 run na ki 24 bol. Katba u Aiban Tyngshaiñ Rajee u la shim 2 wiket ha ki 3 over.
Haba wan beh ïa ka thong, ki nongtied ka Mawmluh CC ki la shah pynhap lut baroh na ka bynta ban ïoh tang 78 run ha ki 14.5 over. U Pynsuklang Rajee u la tied 23 run na ki 22 bol. Katba u Arky Kharbhih u la shim 4 wiket ha ki 3 over. Ïa ka nam Player of the Match la ïohpdiang da u Marken B Kharkongor.
