Amlarem, Rymphang 06
Ka Amlarem SC ka la ïoh rah ïa ka nam lahduh ha ka Super Division-Amlarem Football League ba la pynïaid da ka Amlarem Sub-Divisional Sports Association (ASSA), hadien ba la lah ban pynliem noh ïa ka Seinbhalang Shkentalang da 1-0 kol ha ka jingïakhun final kaba la long ha ka Sngi Palei.
Ha lyndet kane ka nam jop jong ka Amlarem SC ka la wan lyngba ka kol na u Wankibha Pohthmi ha ka minit kaba 22 kaba la biang pura ïa ka kynhun jong u ban pynïoh jingjop bad rah shisyndon ïa ka nam lahduh mynta ka kynti.
Da kane ka nam jop, u Wankibha u la ïohpdiang ruh ïa ka khusnam Man of the Match. Ïa ka nam Top Scorer la ïohpdiang da u Tip Rasmut, katba ïa ka nam Best Goalkeeper la ïohpdiang da u Nangbun Surong kiba dei na Amlarem SC.
Hadien kane ka jingïalehkai la sam ïa ki khusnam sha ka lahduh (Amlarem SC) da ka song pisa kaba T.1 lak ryngkat ka trophy, katba ka Seinbhalang Shkentalang kaba wan ba-ar ka la ïoh ïa ka song pisa kaba T. 50,000 ryngkat ka trophy.
Ha kane ka sngi la wan sakhi lang da u Principal ka North Liberty Higher Secondary School, Jowai, Bah Richard B Uriah kum u kongsan ha ka jingïadonlang ki nongkitkam bad ki dkhot jong ka ASSA kynthup u Bah Wansuk Lamin kum Working President, Bah Dapmon Tariang kum General Secretary, Bah Shngaiñlang Suting kum Sport Secretary nalor kiwei pat.
