Jerusalem, Rymphang:
Ka Israel ka iathuh ba ha ka janmiet jong ka Sngi Palei ka la ioh ban leit thombor ia ki ar tylli ki jaka ha Lebanon, kiba la kynnoh ba ki don ia ki tiar ïakhun jong ka kynhun Hezbollah, wat hapdeng ka jingiateh kular ban sangeh iasiat.
La ong ba ki shipai Israel ki la leit hiar thma sha ki jaka jong ka Lebanon ha ki ar tylli ki jaka shipai kiba don ia ki tiar ïakhun thma jong ka Hezbollah, kiba long ruh ka jingpynkheiñ ia ka jing-iateh ban sangeh iasiat bad ka Israel.
Ka jingsangeh thma jong ka Israel bad ka Hezbollah ka la sdang naduh ka 27 tarik u Naiwieng hadien palat shisnem jong ka jingiakynad hapdeng kitei ki ri naduh ba ka Israel ka la leit ban hiar thma ia ka kynhun lehnoh Hamas kaba synshar hi ia ka nongbah Gaza baroh shi katta ki snem ba la leit.
Hynrei, ha kane ka por la ong ba wat hapdeng ka jingiasoi ban sangeh thma, ka Israel ka la bteng ban leit hiar thma sha Lebanon bad baroh arliang ri bunsien ki ju ia kynnoh kawei ia kawei pat halor ia pynkheiñ ïa ka jingïateh kular.
Ka Hezbollah, kaba la kyrshan da ka Iran, ka dei ruh ban pynphai biang ïa ki shipai jong ka, sha ka phang Shathie jong ka wah Litani, kaba jngai kumba 30 Kilometres (20 mer) na khappud bad ban pynpra noh ïa kino kino ki jingtei bad ki ktem shipai kiba dang sah ha ka thaiñ Shatei Lam Mihngi.
