Shillong, Rymphang 07
U Myntri Rangbah ka Jylla, Conrad K. Sangma u la ai khublei kyrpang ïa ki nongking-lieng ka Jylla kiba la wanrah burom ïa ka jylla da kaba ïoh khur takma ha ka 38th National Games 2025 kaba la long ha Uttarakhand.
Ha kane ka lympung kaba dang ïaid mynta ha Uttarakhand, u Vikash Rana u la khur ïa ka takma ksiar ha ka Men’s Kayak Cross Extreme Slalom, ïa ki takma rupa la khur da ka Elizabeth Vincent ha ka Women’s Kayak Cross Extreme Slalom bad u Indra Sharma ha ka Men’s Slalom C1 Event bad u Pynshngaiñ Kurbah ba la khur ïa ka takma rnong ha ka Men’s Slalom K1 Event. Kine baroh saw ngut ki dei na ka Meghalaya Canoe Association. Katba ïa kawei pat ka takma rnong la khur da ar ngut ki nongking-lieng jong ka Rowing Association kata ka Kiran Devi bad ka B. Anandhi Bronze ha ka Lightweight Women’s Double Sculls.
Haba ïakren bad kitei ki nongïalehkai ryngkat ka jingdon lang ki coach lyngba ka video conference kaba la long ha ka Sngi Thohdieng, u Conrad u la pynpaw hakhmat jong ki da kaba ong ba ynda ki la wanphai sha la ïing, na ka liang ka Sorkar kan sa leh eiei na ka bynta jong ki la ka long ha ka liang ka jingpynkup burom ne ha ka liang ka bhah kam bhah jam kaba la dep ban pruid dak ha ka jingpynkhreh ïa ka Sports Policy.
“Kumba ma phi hi baroh phi ïa sngewkmen, kumta ma ngi lang baroh ngi ïa kmen lang. Wat la kham ha shwa nga la ïoh ban pynpaw tang ha u Pynshngaiñ, hynrei kam long kaba dei ïa nga ba khlem da pynpaw lang ha phi baroh bad ban ai khublei kyrpang halor kane ka jingjop,” u la bynrap.
“Ngi baroh ngi da sngewsarong shibun eh halor kane ka jingjop, ngin ap ban pdiang burom ïa phi baroh ha ka nongbah Shillong. Kin don shibun kiei-kiei kiba ngin sa ïakren kumba nga la dep ban pynpaw ha u Pynshngaiñ bad kine kiei-kiei kiba ngin sa ïakren kin long tad ynda phi la wanphai sha la ïing.”
Ha kajuh ka por u la pynpaw ka jingai khublei kyrpang ïa ki shikurim kata u Ian Stuart Vincent na Australia bad kum u coach jong kane ka kynhun lem bad Sheila Vincent, kiba la trei shitom na ka bynta ban saiñ dur ïa ki khynnah kiba don ha ka thaiñ Ri Bhoi ba kin long kiba paw wat haduh ka National Games.
Shuh shuh u Conrad u la ong na ka liang ka Sorkar kan ai jingkyrshan pura ïa kane ka jait jingïalehkai khnang ba kan nang lah ban sei shuh ïa ki nongking-lieng kiba kynsai jong ka Jylla.
