Washington DC, Rymphang:
Da ki spah ngut ki nongïakhih ki la ïalum lang ha ka nongbah jong ka America ha ka Sngi Balang kum shi bynta jong ka jingïakhih paidbah kaba heh duh hapoh ka ri baroh kawei ban pyrshah jur ïa ka jingthmu jong ka sorkar u Trump ban pynpra noh ïa ka US Agency for International Development (USAID) kaba long ka tnat ai jingïarap kaba heh tam ha ka pyrthei.
Ka jingiakhih shabar jong ka Capitol building ha Washington DC, ka dei kawei na ki jingiakhih ba la pynlong da ka jingiakhih online kaba la ai kyrteng 50501, kaba ieng na ka bynta 50 tylli ki jingiakhih, 50 tylli ki Jylla, tang ha ka shi sngi. Ki nongïakhih ki thmu ban pynkhih pyrshah ïa ka jingsynshar jong u President Donald Trump kaba la weng kynsan kynsan ïa jan baroh ki nongtrei jong ka USAID na ka kam bad shabar jong ka madan. Ki nongtrei jong ka USAID kiba la shah ktah ki dei napdeng ki nongïakhih ryngkat bad katto katne ngut ki nongmihkhmat jong ka seng Democratic.
Kane ka hukum ba la pynmih da ka sorkar jong u Trump ha ka Sngi Ba-ar ka la long hadien ar taiew shiteng ba ki kynhun jong u heh spah Elon Musk ki la pynpra ïa shibun ki bynta jong ka USAID, da kaba khang noh ïa ka kam kaba la neh kumba 60 snem mynta bad kaba thmu ruh ban wanrah jingshngaiñ ia ka US da kaba ai jinghikai ïa ki khynnah, ban ïakhun pyrshah ïa ki jingpang ba saphriang bad ban kyntiew ïa kiwei pat ki kam pynroi shabar ri. Utei u riewstad uba la kha ha South Africa, u la shah khang lynti ha U Trump ban ialam ia ka tnat ba la khot ka tnad treikam jong ka sorkar (DOGE).
Kumta ha katei ka sngi, la ong ba ka la mih ka sur pyrta kaba jam na ki paidbah nongiakhih jong ka ri ha kaba ki la ong “U Elon Musk, u dei ban leit noh shi syndon”.
Ki nongïakhih ki la pynpaw ruh ïa ka jingsngewkhia halor ka jingiadon bynta jong utei u CEO jong ka Tesla, u Elon Musk bad ka sorkar US ha kane ka sien.
