Shillong, Rymphang 09
Ka lympung ïalehkai Super Division Shillong Cricket League 2024-25 ba la pynïaid da ka Shillong Cricket Association (SCA) ka la nangjam shaphrang ha kaba ka Lumpyngngad SCC ka la ïoh jingjop hadien ba ka la pynliem noh ïa ka Rangkynsai CC da 25 run ha ka Sngi U Blei.
Ha kane ka jingïakhun kaba la long ha madan Polo, ka Lumpyngngad ka la kam trai ban tied nyngkong ha kaba ka la ïoh 133 run bad shah pynkhyllem 10 wiket ha ki 30.2 over. U Rahul Shah u la tied 48 run na ki 71 bol bad u Praveen Kataria u la ïoh 12 run na ki 14 bol. Katba u Adarsh Joshi u la shim 5 wiket bad ïa ki 2 wiket da u Chaman Pushp.
Haba wan beh ïa ka thong ba la buh da ka liang pyrshah, ka Rangkynsai ka la ïoh tang 108 run bad shah pynkhyllem 10 wiket ha ki 35.3 over. U Ajay Duhan u la tied 24 run na ki 38 bol bad u Mewada Shylla u la ïoh 19 run na ki 26 bol. Katba u Vishal Balmiki u la shim 4 wiket bad 2 wiket da u Rahul Shah uba ïohpdiang ruh ïa ka nam Player of the Match.
