Nongstoiñ, Rymphang 09
Ka lympung ïalehkai NDSA Premier League Football Tournament 2024-25 ka la nang jam shaphrang ha ka sngi Saitjaiñ ba la pynlong ïa ki jingïalehkai jong ka Second bad ka Third Division.
Ha ka Third Division kaba la long ha madan NDSA kaba ha Nongpyndeng,ka Mawrusyiar YCC ka la ïasam mar shi point bad ka Upper Marskuiñ SC hadien ba ïakhaid mar 1-1 kol, kumjuh ka Nondein SC ka la ïakhaid mar 2-2 kol bad ka Laitkseh SC. Katba ka Mawthengsynga FT ka la lah ban pynliem noh ïa ka Lailad SCC da 3-2 kol.
Haba phai pat ha ka kyrdan ïalehkai jong ka Second Division, ka kynhun ïalehkai jong ka Ïew Nongma SC ka la khur ïa ka jingjop hadien ba ka la lah ban pynliem noh da 3-0 kol ïa ka Dommawlie FC, katba ka Dommawlien SC ka la jop da 3-1 kol ïa ka Wahdibah FC.
Na ka liang ka Tournament Committee jong ka NDSA, ka la pyntip ba ka jingïalehkai Super Division kan long ha ka 11 tarik mynta u bnai hapdeng ka Tiehsaw Pengkyllut pyrshah ïa ka Khliehmawlieh YCC ha ka por 2 baje nohphai sngi, katba ha ka 1st Division ka jingïalehkai kan long hapdeng ka Sapkiwest FC pyrshah ïa ka Porshangbet SC ha ka por 11:50 mynsngi.
