Argentina, Rymphang:
Ka shlem treikam jong u President ka Argentina ha kane ka taiew ka la iathuh ba u President Javier Milei, u la shim ia ka rai ban khang ia ki jait jingsumar lane ki ‘Surgery’ ban pynkylla ia ka jinglong shynrang ne kynthei, ia ki khynnah rit, kumjuh ban buh pud ia ki kynthei ‘trans’ ba kin shah set hapoh patok jong ki kynthei lada ki leh ia katei kaba la dep ban mana da ka sorkar. Katkum ka jingkren na ka shlem treikam jong u, u Milei uba dei u nongkyrshan laitluid sha ka liang kadiang, un pynmih ia ka hukum ba ki koidi ki dei ban shah pynshong la ka jong katkum ka jinglong shynrang ne kynthei ki ba la pynrung kyrteng ha ka por ba ki leh ia katei ka kam runar.
Wat la ka long kum-ta, ka la ong ba ym don kawei ruh ka kynthei ‘trans’ kaba shah set ha patok jong ki kynthei lada shah rai pynrem na ka bynta ki kam runar ha ka kam shongkha shongman, ka jingkhaii briew ne ki kam runar pyrshah ïa ki kynthei.
Hynrei katei ka ophis u President kam shym la pynshai pat haduh katno ngut ki kynthei ‘trans’ ki don ha ki patok jong ki kynthei ne kiba la shah rai pynrem na ka bynta kum kine ki jait kam runar bad kam shym la ong ruh kumno kane ka jingkylla kan ktah ïa ki briew kiba ïapher jaitbynriew, kiba la kha bad ki jinglong ba kynja met ki bym dei ki arliang mamla.
