Washington, Rymphang:
Ka America ha ka Sngi Thohdieng ka la pynbna ïa ka jingmynjur ban die palat $7.4 Billion ki bom, ki ‘namding bad ki tiar thma bapher sha ka Israel, kaba long ka ri kaba la pyndonkam bha ïa ki tiar thma ba la shna bad pynmih da ka America ha baroh shi katta ki por ka jingiakhun thma jongka bad ka Hamas kaba synshar hi ia ka nongbah Gaza.
Kumta la ong ba ka tnat kam pohïing jong ka US, ka la soi ia ka jingiakut ban die ïa ki bom bad ki tiar thma bapher kiba kot ia ka $6.75 billion, nalor jong ki namding Hellfire, kiba shongdor $660 million.
Namarkata ruh la ong ba kane ka jing mynjur jong ka US ban die ia kitei ki tiar thma sha ka Israel, kan iarap ruh ia ka Israel ban nang lah ban tehlakam ia ki jingeh bad ki jingma kiba ap kylleng sawdong ia ka namar ka jingleit hiar thma jongka ia ka Hamas kaba la ioh jingkyrshan na kiwei de ki kynhun lehnoh bapher jong ka pyrthei.
Ka Israel ka la sdang ïa ka jinghiar thma kaba shyrkhei bha pyrshah ïa ka Hamas ha Gaza ha u bnai Risaw jong u snem 2023 kum ka jingpynhiar kput halor ka jingleit hiar thma dusmon jong ka Hamas ia ka Israel ha ka 7 tarik jong utei u Risaw khlem kano- kano ka daw ne ka jingiathud bad ka Israel.
Bad la ong ba ka thma jong ka Israel bad ka Hamas, ka la pynjulor ïa shibun ki bynta jong ka nongbah Gaza, ka jaka rit harud duriaw Mediterranean, kaba la pynlong ïa kiba bun ki paid nongshong shnong ba kin phet krad bad her iap noh na katei ka ri. Pynban kane ka thma ka la sdang ban jai-jai bad sangeh shipor ia mynta katba dang treikam ka jingiateh soskular ban sangeh thma hapdeng ka Israel bad ka Hamas hapoh ka jingialam jong ka US bad ki ri Sepngi ban pynurlong noh ia ka jingiakren iasuk hapdeng kitei ki arliang mamla.
Haba iadei pat bad ka jingsngewkhia halor ka jingïap jong ki riew paidbah, ka sorkar jong u Joe Biden, u President jong katei ka por, ka la khanglad ïa ka jingshalan ïa ki bom kiba lah tam ia ka 2,000 pound sha ka Israel kiba kham heh ban ïa kito kiba don ha ka jingthmu ban die kaba dang shen hynrei la ïathuh ba u nongmihkhmat jong u, u Donald Trump, u la mynjur ïa kane ka jingshalan, hadien ba u la wanphai biang sha ka bor.
