Washington, Rymphang:
U President ka U.S, Donald Trump ha ka Sngi Thohdieng u la ong ba u lah ban leit iakynduh ia u President ka Ukraine, Volodymyr Zelenskiy ha ka taïew ban wan ban iakren halor ka thma jong ka Ukraine bad ban khang lad noh ia ka jingleit rung ki shipai ka Russia.
U Trump um shym la kren shai la kan dei ka jingïakynduh markhmat ne ka jingïalang lyngba ka ‘video Conference’. Hynrei u la kren shaphang kane halor ka jingkylli na ka liang ki nongthoh khubor ha ka jingpdiang burom ïa u Myntri Rangbahduh ka Japan u Shigeru Ishiba hapoh Oval Office bad dei ha katei ka por ba u Trump u la pynmih ia kitei ki kyntien bad iathuh ba shen un sa ioh ban iakren markhmat bad u President ka Ukraine halor ki mat ba iadei bad ka thma.
Haba kylli ïa ka jaka na ka bynta kum kane ka jingïakynduh bad u Zelenskiy, u Trump u la ong pat ba un don beit ha US bad um ym leit sha Ukraine kat ia mynta hynrei u la ong ba u kwah shisha ban iohi ba ka thma jong ka Russia bad Ukraine kan kut noh.
U Trump u la ong ba u kwah ban ïakren bad u Zelenskiy halor ka jingïada ïa ki marpoh khyndew jong ka Ukraine kum ki marpoh khyndew kiba duna bad u kwah ïa ka jingthew ba ïaryngkat kum ka jingsiew kylliang ïa ka jingkyrshan jong ka U.S.
Ka Ukraine, kaba kwah ban bteng ïa ka jingkyrshan jong ka U.S. ha ka thma jong ka bad ka Russia, ka khmih lynti ïa ka jingleit jngoh jong utei u nong-ialam ba thymmai ka US hapoh jong une hi u bnai.
U Yermak u la ong ba u la ïakren bad u Kellogg halor ki phang kiba kynthup ïa ka jinglong jingman ha madan thma, ka jingshngaiñ jong ki riew paidbah ka Ukraine bad ki jingïalang ha ka jingïalang pahara kaba man la u snem ha Munich ha kaba kut jong une u bnai.
