Jowai, Rymphang 09
Ka West Jaiñtia Hills District Wushu Associa-tion (WJHDWA) ka la shim ïa ka sien jam ban pynkup burom ïa ki 12 ngut nongïalehkai wushu shynrang bad kynthei kiba la khur takma ha ka 6th Meghalaya Games 2025 kaba dang shu dep shen ha nongbah Jowai. Ïa kane ka jingïalang pynkup burom la pynlong ha Vianney Hall Marianhill, Jowai ha ka sngi Saitjaiñ. Kine 12 ngut ki kynthup ïa 8 ngut ki shynrang bad 4 ngut ki kynthei. Ki takma ba la ïoh khur ki kynthup ïa 2 tylli takma ksiar, 4 tylli takma rupa bad 6 tylli takma rnong.
Ha kane ka sngi la ïadonlang u District Sports Officer u Bah Khroobok Passah, u Vice President WJDSA Bah Patrick Lamare, ki nongïalam bad dkhot nongkitkam ka WJHDWA ba kynthup ïa u President Bah Ferdinand Suchiang, Secretary bah Niawki Ïakai nalor kiwei pat.
Haba ïakren bad u Riwodmiki Lyngdoh, u samla uba ïoh khur takma ksiar ha ka rukom ïalehkai Kungfu bad takma rupa ha ka jingïalehkai tynrai Nanquan, u la pynpaw ka jingkmen halor katei ka jingjop ka jong u.
U la ïathuh ba kane ka dei ka sien kaba ar ïa u, ba u la ïashim bynta ha ka Meghalaya Games ha kaba ka sien kaba nyngkong ka dei ha Tura ha kaba um shym la ïoh khur ïa ki takma.
