Shillong, Rymphang 09
Ka Sorkar Pdeng lem bad ka Indian Olympic Asso-ciation (IOA) ki la pynthikna ban pynlong ïa ka 39th National Games 2027 ha ka jylla Meghalaya.
Ïa kane la ïathuh da u Myntri ka tnat ïalehkai jong ka Jylla u Bah Shakliar Warjri ha ka Sngi U Blei hadien na ka liang ka Sorkar ka la leit ban ïakynduh mynshem snem ïa u Myntri ka tnat ïalehkai ka Sorkar Pdeng. “Ha u Nohprah jong u snem 2024 ha ryngkat ka jingïadon lang Myntri Rangbah ka Jylla u Conrad K. Sangma, ngi la ïoh ban ïakynduh ïa u Myntri ka Sorkar Pdeng ba dei khmih ïa ka tnad ïalehkai u Dr. Mansukh Mandaviya ha nongbah Delhi halor ka jingthmu ka Jylla ban ïoh pynlong ïa ka 39th National Games ha u snem 2027.”
“Te kumta mynta ka sngi ngi la ïoh ïa ka jingpynthikna na ka Sorkar Pdeng bad kumjuh na ka IOA ba ngin pynlong ïa katei ka lympung kaba heh duh jong ka ri ha u 2027,” la bynrap u Bah Shakliar lyngba ka durkhih kaba u la pynpaw.
Ha kajuh ka por u Bah Warjri u la kyntu ïa ki nongïalehkai kynthei bad shynrang ban kin ïai trei shitom met bad mynsiem naduh mynta khnang ba kin ïoh ka lad ban shim bynta ha katei ka National Games ka ban long ha kane ka Jylla.
Te kumta ïa mynta ka Sorkar kan hap ban ïaid shakhmat ïa ki jingpynkhreh na ka bynta ki jaka ïalehkai kiba don ha kylleng ka Jylla khnang ban lah pyndep ha shwa ban sdang katei ka lympung.
U Bah Shakliar u la pynpaw ka jingai khublei ruh ïa baroh kiba la wanrah nam rah bad burom ïa ka Jylla da ki nongkinglieng hapoh ka lama jong ka Meghalaya Canoe Association da kaba khur kawei ka takma ksiar, ar tylli takma rupa bad ar tylli takma rnong ha ka 38th National Games kaba la long ha Uttarakhand, lem bad ar ngut kiwei pat kiba la khur takma rnong na ka Rowing Association ha ka Women Double Scull Competition.
