Shillong, Rymphang 09
Ka Sanmer bad ka Lagan 2.0 ki la lah ban pynthikna ban jam sha ka semi final ha ka Third Division Shillong Cricket League 2024-25 ba la pynïaid da ka Shillong Cricket Association (SCA).
Ha kane ka jingïakhun kaba la long ha ka Sngi U Blei ha madan Urkaliar Shillong, ka Sanmer ka la pynliem noh ïa ka Slog Warriors da 13 run. Ka Sanmer ka la kam trai ban tied nyngkong ha kaba ka la ïoh 179 run bad shah pynkhyllem 6 wiket ha ki 20 over. U Donborlang u la tied 34 run na ki 29 bol bad u Elton u la ïoh 31 run na ki 24 bol. Katba u Sonu u la shim 3 wiket bad ïa ki 2 wiket la shim da u Rohan na ka bynta ka Slog Warriors.
Haba wan beh ïa ka thong, ka Slog Warriors ka la ïoh tang 166 run bad shah pynhap 9 wiket ha ki 20 over. U Rajesh u la khyrwit ïa ka shiteng spah kaba 73 run na ki 35 bol bad u Biswajit u la ïoh 17 run na ki 13 bol. Katba u Hubert u la shim 4 wiket bad ïa ki 2 wiket la shim da u Wadbor na ka bynta ka Sanmer. Ïa ka nam Player of the Match la ïohpdiang da u Hubert.
Haba phai sha kawei pat ka jingïakhun kaba ar, ka Lagan 2.0 ka la jop da 57 run ïa ka Inningstars Laitumkhrah. Ka Lagan 2.0 kaba la shimti ban tied nyngkong ka la ïoh 208 run bad shah pynhap 7 wiket ha ki 20 over. U Rohit u la tied 73 run na ki 47 bol bad u Anuj u la ïoh 42 run na ki 34 bol. Katba u Akash u la shim shi wiket na ka bynta ka Inningstar.
Haba wan ban beh ïa ka thong, ka Inningstars Laitumkhrah ka la ïoh tang 151 run bad shah pynhap 8 wiket ha ki 20 over. U Suraj u la tied 26 run na ki 10 bol bad u Anil u la ïoh 23 run na ki 16 bol. Katba u Mukesh bad u Anuj ki la shim mar 2 wiket na ka bynta ka Lagan. Ïa ka nam Player of the Match la ïohpdiang da u Rohit.
