Manchester, Rymphang:
Kawei ka liengsuiñ jong ka EasyJet, kaba leit sha Manchester, ka la hap ban hiar kyrkieh noh ha ka nongbah Athens jong ka Greece hadien ba u nongñiah jong katei ka liengsuiñ, u la kyllon kynsan ha ka jaka ba u shong katba dang pynher ia katei ka liengsuiñ. Ka jingkulmar ka la mih ha ka liengsuiñ katba ki nongtrei jong ka liengsuiñ ki la mareh sha ka jaka shong jng utei u nongñiah ka liengsuiñ bad ki la pyrta ban pan jingïarap na ki doktor. Ki nongtrei jong ka liengsuiñ ki la buh stet ïa ka screen sawdong jong u nongniah liengsuiñ, uba don ha ka jingeh kaba khraw, shwa ban pynbna sha kiba shong hapoh ba katei ka liengsuiñ ka hap ban hiar noh shiteng lynti namar ka jingkyllon jong utei u nongñiah.
Hadien kata, la ong ba uwei pat u nongñiah ‘co-pilot’, u la shim ia ka jingkitkhlieh ban pyn-hiar ia ka liengsuin ha Kad Liengsuin jong ka Athens, ha kaba ki nongsumar bad ki kali ba kyrkieh ki la ap ha ka lynti iaid kjat ban ai jingsumar kyrkieh ia u nongñiah liengsuin uba la kyllon khlem tip briew shuh.
Ki nongleit nongwan ki la iaroh ia ka jingtrei shitom jong u nongiarap pilot, da kaba iaroh ia ka jinglah jong u ban shim khia bad ban shim ka jingktikhlieh ha katei ka sngi ban pynpoi suk ia ki ha katei ka Kad Liengsuiñ watla kim lah shuh ban poi sha ka jaka ba ki thmu ha ka por kaba dei.
Uwei u nongleit nongwan, uba kwah ban nym pynpaw kyrteng, u la ïathuh ha ki nongthoh khubor hapoh ka Kad Liengsuiñ ba, kumba ar kynta eiei ha ka liengsuiñ, ki la sngewthuh ba don kaei kaei kaba sngew pher. Ha katei ka por, ki nongtrei jong ka liengsuiñ, ki dang ai jingdih, haba kynsan kynsan ki la mareh sha ka jaka shong liengsuiñ, ha kaba uwei pat u briew u la kyllon bad kaba la pynkhihwin ia kiba shong ha katei ka liengsuiñ ha katei ka sngi.
Kumjuh ruh na ka liang u nongai ktien jong ka EasyJet u la ong ba ka EasyJet ka pynthikna ba katei ka liengsuiñ EZY2252 na Hurghada sha Manchester hynnin ka janmiet ka la shah pynphai biang noh sha Athens namar ba u ‘Captain’ u donkam ïa ka jingïarap ba kyrkieh na ki nongsumar.
Ia mynta hi, la ong ba ka jinglong- jingman jong utei u pilot mynta kam pat biang bha bad ym pat lah ruh ban batai. Katba ki nongleit nongwan ki la shah pynsah ha ki hotel ban sah miet bad ki la lah ban book biang pat ïa ki liengsuiñ ban wan phai ha katei ka Sngi U Blei, 9 tarik u Naiwieng.
