Shillong, Rymphang 10
Ar sngi shwa ka jingwan tem bad wan rwai u nongrwai bapawnam ka pyrthei, u Ed Sheeran u ban wan ha ka 12 tarik u Rymphang, 2025 ha JN Stadium ha Madan Polo, ka jingpynkhreh-pynkhrum na ka bynta ban wan tem une u nongrwai ka la sdang long kaba shongshit bha ha kaba ki paidbah nongieid jingrwai ka Jylla ki la kyndeh dik-dik ban sakhi noh ïa ka jingwan pynshongshit une u nongrwai.
Haba kren sha ki lad pathai khubor ha ka 10 tarik u Rymphang 2025 ha ka kamra jingïalang ka ophis treikam ka Deputy Commissioner ka East Khasi Hills District ban pynshai paidbah haba ïadei bad katei ka sngi, ka DC Kong RM Kurbah, ka la ong ba ïa ka khyrdop jong katei ka madan ha katei ka sngi, yn plie ha ka por 4 baje janmiet bad kin don 2 tylli ki khyrdop ki ban plie na ka bynta ban rung shapoh ka madan bad 3 tylli ki khyrdop pat ki ban mih hadien ba la wai ka jingput-jingtem.
“Ïa ki khyrdop yn plie ha ka por 4 baje janmiet. Ngi sngewkhia khyndiat namar ngi don tang ar tylli ki jaka rung. Dei na kata ka daw ba ngi la khot ïa kane ka jingïalang ban pyntip sha baroh kito ki briew kiba wan na ka bynta ka ‘concert’ ba kin sngewbha ban wan kloi khnang ba kan ym don kano-kano ka jingkhynñiat,” ka la ong.
Ka la pyntip ruh ba kan nym don kano-kano ka jingkhang ïa ki skul ne ki jaka pule ha katei ka sngi kumba la leh ha ka por ba wan tem bad rwai u Bryan Adams ha katei kajuh ka madan ha u bnai Nohprah mynshem snem hynrei na ka liang ki bor pynïaid kali kin ïaleh ban pynïaid ïa ki kali ha ka rukom ka ban pyllait ïa ka jingdheng kali bad ka jingsahkut jong ki samla pule.
Ka DC ka la pyntip ruh ba ki paidbah kim ïoh satia ban rah eiei shapoh ka madan lait noh sa tang ki Mobile phone, shabi kali bad ki pla ba thep pisa bad yn ym shah ia ki khyllung kiba hapoh ka 5 snem ka rta.
Ka DC ka la pyntip ruh ba hapoh ka madan yn ngiam kumba 26 hajar ngut ki nongwan peitkai bad utei u nongrwai un rwai ha ka por 6:15 baje, kumta la khmih lynti ba ka jingwan jong ki paidbah kan pyndap ïa ka stadium.
Halor ki kyndon pynïaid kali, u Superintendent of Police (SP) ka East Khasi Hills, Bah Vivek Syiem u la pyntip ba yn nym shah ïa ki kali ban rung ha kiba bun ki jaka bad kine ki kynthup ïa ka jingrung na ka lad Lumjingshai sha ka lad CRPF ha Polo, na Lumjingshai sha ka lad jong ka Police Colony, Lawmali sha Polo, Golflink sha Polo, City Hut Dhaba sha Polo, na BJP ophis sha Oakland, Polo, na BK Bajoria shaphang Fourth Furlong, na Fourth Furlong sha Polo, na Shillong Commerce College sha BK Bajoria bad na Gurudwara sha St. Anthonys’ College.
Ha kaba ïadei bad ka jingpynbeit ïa ki jaka ïeng kali, u SP u la ong, “Ngi don katto katne ki jaka ba ki paidbah ki lah ban pynïeng ïa ki kali jong ki. Ki jaka ki long ha Red Field, Golflinks, jaka ïeng kali rud surok naduh TRS Restaurant sha ophis CM Connect, jaka ïeng kali harud surok ha kylleng ka thaiñ Golflinks, ka Lad FCI haduh Lad Lumjingshai, hapoh ka phyllaw jong ka State Central Library bad hapoh ka phyllaw jong ka State Convention.”
Haba ïadei bad ka jingdie tuh ïa ki tiket ha ka dor kaba rem, na ka liang ka Nikita kaba dei ka nongaiktien jong ka Bookmyshow, ka la ong ba na ka liang ka Bookmyshow kan sa khmih sani bha lada don kino-kino ki briew kiba leh ïa kum kine ki jait kam bad yn khmih bha ruh ïa ki tiket jong ki paidbah kiba wan ha katei ka sngi.
