Shillong, Rymphang 10
Ka jingïalehkai bha u Shavian Blah ka la pynlong ïa ka Cricket Lovers ban pynliem noh ïa ka Laitkynsew CC da 181 run ha ka lympung ïalehkai 4th District League T20 Cricket Tournament 2024 ba la pynïaid da ka East Khasi Hills Cricket Association ha ka Lah Sngi U Blei.
Ha kane ka jingïakhun kaba la long ha madan Saitsohpen kaba ha Sohra, u Shavian u la lah ban khyrwit ïa ka spah run kaba 121 na ki 51 bol na ka bynta ban pynlong ïa ka Cricket Lovers kaba la kam kam trai ba kan tied nyngkong ban ïoh 275 run bad shah pynkhyllem 6 wiket ha ki 20 over.
Katba u Kesper Malngiang, nongkawang bol ka Laitkynsew u la shim 2 wiket na ka bynta ki 3 over.
Haba wan beh ïa ka thong ba la buh da ka liang pyrshah, ki nongtied ka Laitkynsew ki la shah pynkhyllem lut baroh bad ban ïoh tang 94 run ha ki 19.4 over. U Kesper Malngiang u la tied 38 run na ki 47 bol. Katba u nongkawang bol ka Cricket Lovers u Raj Kishor Yadav u la shim 3 wiket na ka bynta ki 2 over. Lyngba katei ka jinglah ban ïalehkai bha, u Shavian Blah u la ïohpdiang ïa ka nam Player of the Match.
Ka jingïalehkai ha ka Sngi Ba-ar kan long hapdeng ka Rangshken ACC pyrshah ïa ka Saitsohpen ha ka por 9 baje mynstep, katba ka Cricket Smit ïa ka Sohra Combine CC ha ka por 12:30 mynsngi.
