New Delhi, Rymphang:
Ka Saudi Arabia ha kane ka sien, ka la kyntait ia ka jingtyrwa jong u Myntri Rangbahduh ka Israel- u Benjamin Netanyahu, ban shim noh ia ka nongbah Gaza sha ka Saudi Arabia.
Kumta, ka tnat kam bar ri jong ka Saudi Arabia ha ka Sngi U Blei ka la kyntait ia katei ka jingtyrwa ba la wanrah da ka Israel bad ong ba kam kwah ban shu leh donbor ne ban shim jubor ia ka bynta kaba dei jong ki hynmen-ki para jong ka na Palestine bad kam kwah ruh ban pynmih daw jingiakynad eiei badki.
Namar ka Saudi ka la ong ruh ba ki paidbah nong Palestine ki don ka hok ba kin im laitluid bad shongsuk- shongsaiñ hapoh ka khyndew- ka bri la jong.
Kane ka jubab na ka Saudi ka long hadien ka jingkren jong u Netanyahu bad ki lad pathai khubor ha ka Sngi Palei, ha kaba u la wanrah ia katei ka jingtyrwa sha ka Saudi Arabia.
Haba iakren halor ka jingkyrmen ban pynbeit ryntih ia ka kam bad ka Saudi Arabia, u nongthoh khubor na ka liang ka diang jong ka Israel u Yaakov Bardugo u la kren bakla da kaba ong “ym don ka jingkiew khlem ka Saudi” ha ka jaka jong ka “ri Palestine”.
U Netanyahu u la pynbeit ia u bad bynrap, “Lymda phi kwah ba ka ri Palestine kan don ha Saudi Arabia. Ki (Saudi) don shibun ki jaka.”
Kumta la ong ba katei ka jingiakren jong u Myntri Rangbahduh ka Israel, ka la wanrah ia ka jingkynthoh na ki katto katne ki ri Arab naba ka long ruh kaba be-aiñ ban shu phah kurup ia ka Gaza ha ka Saudi Arabia.
