Shillong, Rymphang 10
Ka Meghalaya Aids Con-trol Society (MACS) ha ka Lah Sngi U Blei ka la pynkup burom ïa ki ar ngut khlur nongmareh ka Jylla kiba la ïoh jingjop ha ka National Red Run kaba la long ha Goa ha ka 18 tarik u Kyllalyngkot mynta u snem.
Kine ki kynthup ïa u Daniel Diengdoh Wahlang uba la wan ha ka kyrdan ba-ar bad u Skhem-lang Suba uba la wan balai ha kaba ki la ïohpdiang da ka song pisa mar T.15,000 na ka MACS.
Ha kane ka sngi la ïadon lang u Dr. W.B Langstieh, Project Director ka MACS, kumjuh ka Kong Larina Nongpiur, Asst. Director Youth MACS, ki nongtrei katei ka shlem treikam bad kiwei kiwei.
Ïa katei ka jingïakop mareh la pynlong da ka National Aids Control Organisation bad ka Goa State Aids Control Society ba la wan shim bynta da kiba bun ki nongmareh na kylleng jong ka ri.
Haba pynpaw ha ki nongthoh khubor, u Skhemlang u la pynpaw ba ka jingïashim bynta ka jong u ha katei ka National Red Run ka long ba u don ka jingthmu ban ïashim bynta ha ka jingmareh kam pulit kaba 5000 mitar namar bunsien u ju shim bynta tang ha ki jingïakop mareh kiba tang 800 mitar.
Kumba ka paw u Skhemlang u la long u nongmareh uba paw bad uba la ïoh ka jingshah hikai ha ka Kong Deisy Marweiñ (Athletic Coach) ha kaba u la shim bynta ha kiba bun ki jingïakop kiba la pynlong hapoh ka Jylla bad wat shabar kumjuh. U la khur takma ksiar ar sien ha ka North East Games, kumjuh ha ki East Zone bad ïashim bynta ha ki National Games.
Ha kawei pat ka liang, u Daniel Diengdoh u dei u rangïalehkai uba la ïoh ka jingshah hikai ha u Bah Biningstar Lyngkhoi (Athletic Coach) ha kaba u la khur ïa ka jingjop ha ka Inter District kaba la long ha ka nongbah Shillong bad hadien kane u la shah jied ban leit shim bynta sha Goa ha kaba u la lah ban wan ha ka kyrdan ba-ar.
