Jowai, Rymphang 10
Ka Azad AFC2 bad KSF FC ki la jam sha ka quarter final ha ka lympung ïalehkai ’11th Secondary School Football Knock-out Tournament 2024-25′ ba la pynïaid da ka Dorbar Shnong Pdengshakap hadien ba ki la ïoh jingjop ha ka wat ba ar ha ka sngi Saitjaiñ ha madan Pdengshakap.
Ha kane ka jingïalehkai ka Azad AFC2 ka la pynrem noh ïa ka DC da 4-3 lyngba ka tie-breaker hadien ba ka jingïakhun ha ka por ba ka buh ki la ïakhaid mar 2-2 kol.
Ha kane ka jingïakhun ka DC ka la ïoh ban thep kol nyngkong eh lyngba u Shongsuk Jungai ha ka minit kaba 14 bad ïa ka kol kaba ar la thep da u Fred Lamare (36), hynrei hadien ar minit ka Azad AFC2 ka la lah ban pynphai kylla lyngba u Wadshwa Lato (38) bad ïa kawei pat la thep ha ka kylla miet lyngba u Bachan Pale (70) na ka bynta ban ïakhaid mar ar kol.
Haba phai sha kawei pat ka jingïalehkai kaba bud, ka KSF FC ka la pynliem noh ïa ka Golden Lion Syndai FC da 2-0 kol. Kane ka nam jop ka la wan urlong lyngba u Owan Pajuh uba la thep ha ka minit kaba 69 bad Aenam Jyrwa (70).
Ka jingïalehkai ba khatduh jong ka wat ba ar kan bteng ha ka 15 tarik mynta u bnai hapdeng ka YC Pdengkarong pyrshah ïa ka Nongdawah SC (Mawryngkneng) ha ka por 2 baje nohphai sngi.
