Shillong, Rymphang 11
Ka Bharatiya Janata Party (BJP) ka la thaw ïa ka komiti ban wad bniah halor ki jingkynnoh tih dewïong be-aiñ hapoh ka Jylla.
Kane ka komiti ka la ïoh por ruh 40 sngi ban wanrah ïa ka kaiphod haba ïadei bad kane ka bynta.
“U State-President ka BJP, Rikman G. Momin u la thaw ïa ka komiti wad bniah ha ka 6 tarik Rymphang, 2025. Ïa ka komiti la ai por 40 sngi ban wanrah ïa ka kaiphod halor kane kajuh ka bynta,” ong ka kyrwoh na u State-General Secretary ka BJP, Bah Wankitbok Pohshna.
Ha ka jingpynkylla ba shi bynta haba ïadei bad ka komiti, la thung ïa ki 10 ngut kum ki dkhot jong ka komiti ban khmih bniah halor ka jingkynnoh tih dewïong be-aiñ hapoh ka Jylla.
Kine ki kynthup ïa u Bernard N. Marak kum u Convener, Bah Mariahom Kharkrang kum Secretary bad Bah Lakhon Biam, Raphius Sangma, Commanderful Sana, Bah Karbar Tyngkan, Kong Daniella Nonglait, Kong Darihun Marbaniang, Arun Kumar bad Pramod Jain kum ki dkhot.
Ka BJP hapoh ka Jylla ka dang pynkhreh ban “pynpaw pyrthei” ïa ka jingkynnoh tih bad shalan dewïong be-aiñ hapoh ka Jylla.
Ki heh jong ka seng ki la wad bniah bha halor kane ka kam bad ki la pynkhreh ruh ïa ka kaiphod kaba bniah kaba shen yn sa aiti sha ka ophis treikam jong ka seng ha Delhi ban leh ïa kaba donkam.
Hashuwa, u Vice-President ka BJP, Bernard N. Marak u la ong ba ka seng ka la leh ïa kaba donkam bad lum thup ruh ïa ka kaiphod kaba bniah.
“Ka komiti kan sa khmih bniah ïa ki jinglap jong ngi, bad ngi kyrmen ba u President ka seng un rah ïa kane ka mat sha ka kyrdan kaba kham halor,” u la ong.
