Washington, Rymphang:
U President ka US Donald Trump ha kane ka kynti u la byrngem tyngeh ia ka Hamas bad ong ba ka Hamas ka dei ban pyndep noh kloi ia ka jingiakut pyllait briew namar lada kam lah ban pyllait noh hapoh jong kane hi ka taiew, ka US kan pynpulom noh shisyndon ia baroh ki jingiakren sangeh thma.
Namar la ong ba kane ka jingkren jong u Trump ha Middle East ka long hadien ba ka Hamas ka la byrngem ban pynsangeh noh ïa baroh ki jingpyllait briew bad kaba la buh ha ka jingma ruh ïa ka jing-iasuk bad jingsangeh thma kaba tang shipor (hynriew taiew) bad kaba la sdang treikam naduh ka 19 tarik u Kyllalyngkot.
Haba kdew ïa kane ka jingleh jong ka Hamas kum ka jingma kaba khraw, u Trump u la kren ha ki nongthoh khubor ha Oval Office ba un ailad ia ka rai jong ka Israel halor kaei kaba dei ban jia ha kaba kut halor ka jingsangeh thma.
Namar u Trump u la ong ba ka Hamas ka dei ban pyllait noh ia baroh kito kiba ka la rahbor naduh ba sdang jong ka thma bad lada kam lah ban leh ia kane ha ka por ba la iakut, kan duh noh shisyndon ia baroh ki lad jingiasuk bad ka US kan ailad ia ka Israel ba kan pyndep ia ka kam kaba sah baroh.
U Trump u la ong ba lehse un sa ïakren bad u Myntri Rangbahduh ka Israel- u Benjamin Netanyahu halor ka por ba u dang shu tyrwa.
Hynrei um shym la batai bniah pat ia kaei kaba ka jingbyrngem ka wanrah, u la ong tang ba ka Hamas kan lap ia kaei kaba u mut ban ong.
U President ka US u la byrngem ruh ban pynsangeh noh ïa ka jingai jingïarap sha ki paralok jong ka Jordan bad ka Egypt lada ki kyntait ban shimti ïa ki nong Palestine katkum ba la tyrwa da ka America ban shimti hi noh ïa ka Gaza. La ong ruh ba u Trump un sa leit ban iakynduh ia u Syiem Abdullah II jong ka Jordan ha Washington ha kane hi ka taiew.
Kane ka jingbyrngem ka la mih hadien ba ka Egypt ha kine ki khyndiat sngi ba la leit ka la kyntait ba kano-kano ka jingïapynbeit ka ban pynkheiñ ïa ka hok jong ki nong Palestine, kan ym lah ban pdiang ia kum kita.
