Shillong, Rymphang 11
Ka Dorbar Khliehshnong Sohra ka la pynkynmaw ïa ka Sorkar Jylla halor ar tylli ki projek shna madan ïalehkai lyngba ka Khelo India Scheme ïa kaba la dep ban mynjur da ka Sorkar Pdeng naduh lai snem mynshwa.
Kine ar tylli ki projek ki long ka jingsiang phlang plastik (Synthetic Football Turf) ha Wahshari bad ka Synthetic Athletic track ha Madan Khliehshnong, Sohra.
Na ka liang u Rangbah Shnong ka Sohra, Dr. Shembhalang Kharwanlang u la dep ban aiti ïa ki kot ki sla sha u Myntri Rangbah ka Jylla u Conrad K Sangma ha ka Cabinet Retreat kaba la long ha u bnai ba la lah ha Sohra ha kaba la ïadon lang u Myntri ka tnat ïalehkai u Bah Shakliar Warjri, kumjuh u Commissioner Secretary ka tnat ïalehkai u Dr. Vijay Kumar bad kiwei ki heh ophisar.
Lah ban kdew ba ha ka 5 tarik u Jylliew 2022, na ka liang u Myntri barim ka tnat ïalehkai u Bah Banteidor Lyngdoh u la pynthikna ba na ka liang ka tnat ïalehkai jong ka Sorkar Pdeng ka la mynjur na ka bynta kitei ki projek ha Sohra, kumjuh kiwei ki projek shna madan phutbol (artificial turf) ha Pynursla, Mairang, Kurkalang ha Bhoirymbong bad ha Umsning. Hynrei haduh mynta ym pat shym la lah ban pynurlong ïa ki.
Te kumta utei u Rangbah Shnong u la kyntu ïa u Myntri Rangbah ba un tuklar lem na ka bynta ban kham pynkloi ha ka ban pynurlong khnang ba kan long ka jingïarap na ka bynta ki khynnah kiba don ha ki sap ïalehkai lem bad ki klob.
