Washington, Rymphang:
U Myntri kam bar ri jong ka Egypt, Badr Abdelatty, ha ka jingiakren bad u U.S. Secretary of State- u Marco Rubio ha ka Sngi Nyngkong, u la iathuh ba ki ri Arab ki kyrshan ia ki nong Palestine bad kyntait ia ka jingthmu jong u President U.S Donald Trump ban pynkynriah noh ia ki nong Palestine na Gaza bad ba ka US kan shimti hi noh ia katei ka nongbah khnang ban lait na ka jingsynshar donbor bad ka jingsynshar ka bym hok jong ki lehnoh Hamas.
Ha ka kyrwoh, ka tnad kam bar ri jong ka Egypt, ka ong ba u Abdelatty ha ka jingialang ha Washington, u la ban jur ia ka jingdonkam ban pynstet ia ka jingtei thymmai ia ka Gaza, katba ki nong Palestine ki dang sah hangtei.
U Abdelatty uba la poi sha Washington ha ka Sngi U Blei, u la ong ba u khmih lynti ban ïatreilang bad ka sorkar thymmai jong ka U.S. ban ïoh ïa ka jingsuk kaba pura bad kaba hok ha kane ka thaiñ.
Namar la ong ba kano-kano ka jingai jingmut ba ki nong Palestine kin mih noh na Gaza kaba ki kwah kum shi bynta jong ka ri kaba laitluid, ka la long ka jingtim ïa ki nongïalam jong ka Palestine la bun pateng bad ki ri Arab marjan ki la kyntait ïa ka naduh ba la sdang ka thma Gaza ha u snem 2023.
Ka tnat kam bar ri jong ka Egypt ka la ong ruh ba ka pyrthei ka dei ban ïatylli ha lyndet jong ki nong Palestine ban pynbeit ïa ka jingbymhok kaba la shong tynrai bad ban pynphai biang ia ki hok jong ki paidbah kiba dei hok bad ki bym shym dei ban leh klet ne pynduh noh.
Kumta ruh la ong ba katei ka jingthmu jong u Trump ka la wanrah ïa ka jingpynrem na kiba bun ki ri bad ki nongialam jong ka pyrthei, ha kaba ki nongïalam jong ka thaiñ Middle East bad jong ka pyrthei hi baroh kawei ki la ong ba kum kane ka jingleh kan buh jingma pynban ïa ka jingshngaiñ jong ka thaiñ Middle East.
