Shillong, Rymphang 11
Ka lahduh jong ka aïom ba la dep, ka Mawlai SC ka la bteng ban lam-khmat biang ha ka Shillong Premier League 2024, hadien ba ka la lah ban pynjem khnap haduh 6-0 kol ïa ka Nangkiew Irat SC, katba ka Sawmer SC ka la jop ïa ka Nongrim Hills da 4-1 kol ha ka Sngi Ba-ar ha SSA Stadium kaba ha First, Polo.
Ha kane ka jingïakhun u Kevin Rymbai (47′, 58′, 90’+3P) u la ïoh hat-trick na ka bynta ka Mawlai hadien ba ka la hiar ha ka jingïakhun ba la dep da kaba ïakhaid pyrshah ïa ka Langsning FC. Kiwei pat kiba la lah ban thep kol ki long u Overkindness L Mawnai (42′), Banraplang Pyngrope (51′) bad u Donlad Diengdoh (90’+1).
Lyngba kane ka jingjop ka la pynlong ïa ka Mawlai ban don 32 poiñ na ka bynta ban jam sha ka kyrdan sha kliar bad ban tam da 3 poiñ ïa ka Shillong Lajong FC (29 poiñ) kaba la hiar sha ka kyrdan ba-ar.
Katba ka jingjop jong ka Sawmer ka la pynlong ban knieh noh ïa ka kyrdan ba hynñiew na ka Nongrim Hills. Ïa kine ki kol la thep la thep da u Bickyson Kharkongor (25′), Aibanraplang Dohling (31′), Shanmeiaki Warlarpih (42′) bad u Diego Khyriem (59′), hynrei shwa ban wai u Alem Khongwir (87′) u la lah ban pynphai kylla shi kol na ka bynta ka Nongrim Hills. Lyngba kane ka nam jop ka Sawmer mynta ka don 15 poiñ bad ka Nongrim Hills (14 poiñ). Kine ki kynhun ki la don hadien ïa ka Nangkiew Irat (16 poiñ) kaba don ha ka kyrdan ba hynriew.
Kane ka lympung kan bteng biang ha ka Sngi Saitjaiñ ha kaba ka Rangdajied United FC kan ïakhun pyrshah ïa ka Langsning ha ka por 11 baje mynstep, katba ka Nongthymmai SC ïa ka Sawmer ha ka por 2:30 nohphai sngi.
