Shillong, Rymphang 12
Ka Saitsohpen bad ka Marbisu CC ki la ïoh jingjop ha ka 4th District League T20 Cricket Tournament 2024 ba la pynïaid da ka East Khasi Hills Cricket Association ha ka Sngi Balang ha madan Saitsohpen kaba ha Sohra.
Ha kane ka jingïakhun ka Marbisu CC ka la pynliem noh ïa ka Royal Rangers da 8 wiket. Ka Royal Ranger kaba la kam trai ban tied nyngkong, ka la ïoh tang 36 run hadien ba ka la shah pynkhyllem baroh ki nongtied ha ki 11.1 over. U Antoniyus Majaw u la tied 6 run na ki 10 bol. Katba u Richard C. Diengdoh u la shim 3 wiket bad ai 8 run ha ki 3 over.
Haba wan shimti ïa ka pali ba ar, ka Marbisu ka la lah ban kynjoh sha ka thong da kaba ïoh 37 run bad shah pynhap 2 wiket ha ki 4.3 over. U Ramesh Rai u la tied 13 run na ki 7 bol. Katba u Lalaplad Tariang u la shim 1 wiket bad ai 11 run ha ka 1 over. Ïa ka nam Player of the Match la ïohpdiang da u Richard C. Diengdoh.
Haba phai sha kawei pat ka jingïakhun ba ar, ka Saitsohpen ka la jop da 130 run ïa ka Thynroid CC. Ka Saitsohpen kaba la shimti ban tied nyngkong ka la ïoh 204 run bad shah pynhap 4 wiket ha ki 20 over. Kane ka la wan urlong lyngba ka jinglah ban ïalehkai bha u Mebankyrshan Allya uba la khyrwit ïa ka spah run kaba 101 run na ki 58 bol. Katba u Aleric Wanswet u la shim 1/27 ha ki 4 over.
Haba wan beh ïa ka thong ba la buh da ka liang pyrshah, ka Thynroid ka la ïoh tang 74 run bad shah pynhap 10 wiket ha ki 19.4 over. U Aleric Wanswet u la tied 23 run na ki 29 bol. Katba u Banraplang Pyngrope u la shim 3wiket bad ai 4 run ha ki 4 over. Ïa ka nam ‘Player of the Match’ la ïohpdiang da u Mebankyrshan Allya.
