Nongstoiñ, Rymphang 12
Katto-katne ki ‘riew rangbah jong ka thaiñ Nongstoiñ ha ka 8 tarik mynta u bnai ki la plie paidbah ïa ka kynhun ïalehkai phutbol ba la tip kum ka ‘Sapki West FC’.
Ha katei ka sngi, u Bah F. Jahrin uwei na ki ‘riew rangbah ka thaiñ Nongstoiñ u la long kum kongsan ha ka jingdonlang u Bah M. Mawlot uwei na ki ‘riew rangbah ka thaiñ kum symbud kongsan kiba la ïoh ruh ban sam ïa ki memento sha baroh ki dkhot jong kane ka klob.
Lah ban kdew hangne ba kane ka kynhun ïalehkai “Sapki West FC” kaba dang shu mih hapoh ka thaiñ Nongstoiñ, ka dei kawei na ki kynhun kaba don ruh ha ka kyrdan ïalehkai First Division jong ka lympung ïalehkai ka NDSA.
Shuh shuh, la ong ruh ba ka jingthmu jong kine ki ‘riew rangbah ban seng ïa kane ka klob ka long ban kyntiew ïa ki khun samla jong ka dong ka thaiñ West Khasi Hills kumjuh ban pynrung ïa ka jingmut jingpyrkhat jong ki khun samla ka dong ka thaiñ ban lait na ka kyrni ha ki jingdih pynbuaid.
