Shillong, Rymphang 12
Ka jingïalehkai bha u Shubman Gill ka la pynlong ïa ka India ban pynliem noh ïa ka England da 142 ron ha ka ODI balai bad kaba khatduh na ka bynta ban tam da 3-0 ha ka Sngi Balang na ka bynta ban pynkhreh ïa ka Champions Trophy ha Ahmedabad.
Ha kane ka jingïakhun ka India ka la lah ban ïakhun tyngeh lyngba u vice-captain u Gill (112 run) hadien ba u la lah ban khyrwit ïa ki ar tylli shiteng spah ha ka ODI kaba hynñiew ha ka jingïalehkai jong u, katba u Virat Kohli (52 run) bad u Shreyas Iyer (78 run) ki la ïarap ban pynurlong ïa ka India ban kynjoh sha 356 run ha ka pali kaba nyngkong.
Hadien ba la wan shimti ïa ka pali kum nongkawang bol, ka India ka la lah ban ïakhun tyngeh na ka bynta ban pynkhyllem lut ïa baroh ki nongtied ka England na ka bynta ban ïoh tang 214 run ha ki 34.2 over bad ban pynurlong ïa ka jingjop.
Ym shym la don kano-kano ka jingkylla ha ka liang ki nongtied ka England ha kaba u Ben Duckett (34) bad u Phil Salt (24) kiba long ki nongtied kiba nyngkong. Hynrei lyngba ka jinglah ban ïalehkai bha da ki nongkawang bol ka India ka la pynsuki ha ka jingkamai run da katei ka kynhun ka liang pyrshah.
Wat la u Ben Duckett u la lah ban khyrwit ïa phra tylli ki ‘four’, hynrei u la shah pynkhyllem noh ha u Arshdeep Singh (2/33) hadien ba u kapten ka India u Rohit Sharma u la lah ban kem ïa ka bol. U Arshdeep u la lah ban pynhap noh ïa u Salt hadien ba la ïoh kem ïa ka bol da u Axar Patel.
Kumjuh u Tom Banton u la shah pynkhyllem noh ha u Arshdeep hadien ba u la lah ban tied 38 run na ki 41 bol kaba kynthup ïa saw tylli ki ‘four’ bad ar tylli ki ‘six’. U Joe Root u la tied 24 run hadien ba u la shah pynkhyllem noh ha u Axar Patel (2/22). Katba u Harshit Rana (2/31) u la lah ban pynkhyllem noh ïa u Harry Brook (19) bad u Jos Buttler (6).
