Nongstoiñ, Rymphang 12
Ki nongïalam ka Joint Action Committee (JAC) jong lai tylli polling station ba kynthup ïa ka Misei, Langdongdai, Mawsmai ki la shim ïa ka rai ban ym ‘boycott’ shuh ïa ka ilekshon MDC namar ka jingmynjur bad sngap jong ka KHADC ïa ka jingdawa.
Ki nongkitkam ka JAC, ki la ong ruh ba halor kane ka bynta ha ka Sngi Ba-ar ki la pynlong ïa ka jingpynshai paidbah sha lai tylli ki polling station ba kynthup ïa 21 tylli ki shnong, halor ka rai ban ym ‘boycott’ shuh ïa ka ilekshon MDC mynta ka kynti ka daw ka long ba ka KHADC ka la mynjur ban peit bad khmih biang ïa ka jingdawa ki paidbah na 21 shnong ha ka jingshong dorbar ba kyrpang (Special Session) ha ka 19.12.2024 ban pynhap biang ïa kitei lai tylli ki polling station ba don 21 tylli ki shnong sha ka Mawshynrut Constituency.
Shuh shuh ki la ong ruh ba kane ka bill mynta ka dang ap sa tang ban ïoh ïa ka jingsoi u Lat ka jylla hadien kata ki lai polling station ba don 21 tylli ki shnong kan hap biang noh sha Mawshynrut Constituency, bad mynta ka dang sahkut ha DCA ne District Council Affairs.
Ki nongïalam ka JAC ki la ong ruh ba mynta sa shisien shiwat kine ki lai Polling Station ba kynthup ïa ka Misei, Langdongdai bad Mawsmai polling station ki hap ban leit thep ‘vote’ sha Rambrai Jyrngam konstitwensi mynta ka kynti, hynrei ka jingïaleh kam pat kut haduh ban da urlong. Kumta ka JAC ka kyrpad ïa ki paidbah na 21 tylli ki shnong ban kyrshan ïa ka JAC da kaba kin leit thep ‘vote’ bad jied ïa u briew ba bit ba biang khnang ban ym ktah matïong ïa kane ka bill hadien habud.
“Ka JAC ka maham ïa ki paidbah jong 21 tylli ki shnong ba lada bakla jied ïa u MDC ha kane ka kynti, ka lah ban pynsohsat bad pynsahkut biang hajuh ïa kane ka bill ba la pass da ka KHADC lyngba ka Special Session ha ka 19.12.2024 ban pynhap biang sha Mawshynrut Konstitwensi ,” ong ki nongïalam ka JAC.
