Nongpoh, Rymphang 13
U Senior Superintendent of Police ka Ri Bhoi District, Vivekanand Singh Rathore ha ka kyrwoh khubor ba pyllait hynnin ka sngi, u la pyntip paidbah ba ha ka 29 tarik jong u bnai Kyllalyngkot, 2025 la lap ïa uwei u briew uba la mynsaw jur bad thiah lyngktar harud jong ka surok bah National Highway 6 mar pyrshah bad ka Bharat Petrol Pump ïa uba la pynkit noh sha Sonapur Hospital Assam bad hadien pat la pynkynriah noh sha Guwahati Medical College and Hospital (GMCH) namar ka jingjur jong ka jingmynsaw.
Ka kyrwoh na u Vivekanand Singh Rathore ka la pyntip ruh ba utei u rangbah bym lah satia ban tip kyrteng, u la khlad noh hapdeng ka jingshah sumar hapoh katei ka hospital bad ïa ki jingdonkam katkum ki kyndon jong ka aiñ, la pyndep ha thanat Bhangagarh jong ka jylla Assam.
Shuh shuh, lyngba kane ka kyrwoh utei u heh pulit ka Ri Bhoi, u la pyntip paidbah ruh ba utei u rangbah u bym lah satia ban tip kyrteng, u dei uba don ïa ka met kaba long pdeng ha ka jingjrong kaba 5.5 phut eiei, uba don ïa u shñiuh uba ïong, ka rong sniehdoh kaba lam byrïong bad uba phong ïa ka banian rong jngum, ka patlun jean kaba rong dum jngum, ka patlun lyngkot kaba rong jngum bad ki khmat kiba ïong.
