Shillong, Rymphang 13
Ka Mr. Big kaba dei ka kynhun tem sa shisien ka long ba la khreh ban wan pynshong shit ha ka ‘Bloomverse Festival 2025’ ka ban pynlong ha ka 14 tarik u Rymphang 2025 ha Lum’er Pyngngad, Umïam.
Kane ka kynhun ban lamkhmat da u Eric Martin kum u nongrwai, u Paul Gilbert ‘guitar’, bad u Billy Sheehan ‘Bass’. Ka ‘BIG Finish Tour’ kan dei ka tour ba khatduh na ka bynta kane kynhun ha kaba kan wanrah ïa ka sur ba kyrpang jong ki sha India, ka ban pynbyrngia ïa ki nongkyrshan bad ki ‘riew ieid jingrwai.
Kane ka kynhun ka la pynkhreh ban rwai na ka thup jingrwai pawnam jong ki kaba la die sha ki million ngut, ka ‘Lean Into It’ bad kiwei kiwei ki jingrwai ba pawnam ki ban pynkhih mynsiem ïa ki ‘riew ieid jingrwai.
“Ngi sngewkmen ban don ïa ka kyrteng jong ki Mr. Big ha ka tamasa Bloomverse 2025,” ong ki nongpynïaid. “Ka jingwan jong ki ban don bynta ha kane ka tamasa kan rah ïa ka kyrdan jong kane ka tamasa, ka ban pynlong kum ka tamasa ki riewieid jingrwai ‘rock’.
Nalor ka Mr. Big, ha kane ka tamasa yn sakhi ruh ïa ki nongrwai ba pawnam na India bad bar Ri kynthup ïa u Anuv Jain, The Midnight, The Yellow Diary, Lifafa, BLOT!, bad katto-katne na ka thaiñ Shatei Lammihngi.
Ha kane ka tamasa yn don ruh ki jingpynwandur na ki kti ‘art’, kin don ruh ki jaka bam, ki ‘bar’ bad kiwei kiwei ki ban pynbyrngia ïa ki paidbah ki ban wan sha kane ka tamasa.
Ha ryngkat ka jingïatrei lang bad ka tnad Jngohkai pyrthei ka Sorkar Jylla, ka ‘Bloomverse Festival 2025’ kan wanrah ïa ki jingpynbyrngia ba bun jait naduh ka rwai ka siaw, ka put ka tem, ki jingdro bad shna kti bad ka jingpyninam ïa ka kolshor.
