Shillong, Rymphang 13
Kawei ka durkhih kaba la saphriang ha kine shi sngi ne ar sngi ha ka por mynstep ha ki rynsan social media ha kaba uwei u rangbah uba shong hakhmat u la ai jingkren bad u MLA ka VPP jong ka North Shillong konstitwensi u Bah Adelbert Nongrum u shong shadien ryngkat kiwei de ki rangbah.
Kane ka durkhih ba la saphriang ka dei kaba jrong kumba 1 minit eiei ha kaba une u rangbah u la kren da ka jingbitar da kaba ong ïa kine ki kyntien, “Ngim don jingwit jingthut ïa uno-uno u riewshimet hapoh ka seng hynrei ki riewshimet ki thaw ïa ka ‘system’ kaba la pynlong ïa ngi ban buh big question mark”.
U la ong biang, “what is this, ka mut aïu kane ba phin leh, pule ïa kaei ba ngi thoh sha ka seng ba ngi kwah ban pynbeit ïa ka kynrum-kynram, hooid kaei kaba ka seng ka la rai la dep, ngi kloi ban pdiang hynrei ka seng ban sngewthuh ba ka la bakla ban rai, ka jingbakla jong ki ban rai ngi kloi ban ithuh (identify) bad phi ba ngi ruh la bakla, wat la ngim don ha ka bynta ha ka jingshim rai (decision making), haduh katta ngi la kloi ban pynrit.”
Une u rangbah u la pynkut ha kane ka durkhih da kaba ong biang, Baroh ka bri u hynñiewtrep ki ong, jah shano u Bah Adelbert?
Haba kane ka durkhih ka la saphriang ha rynsan social media, u nonglum khubor jong U Nongsaiñ Hima u la pyrshang ban wad jingtip nyngkong ïa utei u rangbah uba ai jingkren hynrei haba la pyrshang ban phone ym shym la ïoh hynrei ynda la pyrshang biang ka phone la pynlip noh.
Kumjuh, u nonglum khubor u la pyrshang ban phone ïa u Bah Adelbert Nongrum hynrei um shym la shim ban pynthikna namar ma u ruh u donlang ha katei ka durkhih hynrei haba la wad ha ïingsah ha Jaïaw um shym la don.
Wat la utei u rangbah um shym la pynpaw kyrteng ïa kano-kano ka seng saiñpyrthei haba u buh jingkylli, hynrei ki khubor ki ïathuh ba ka lah ban dei halor ka jingïapher jingmut halor ka jingai tiket MDC ha kane ka ilekshon MDC ha ka VPP namar ha katei ka durkhih la don lang u MLA ka VPP na North Shillong konstitwensi uba la pynpaw ha kine ki sngi ïa ka jingbym sngewïahap ïa ka jingai tiket ha Jaïaw konstitwensi.
Haba la pyrshang ban wad jingtip na ki ‘riew rangbah kiba don lang ha katei ka jingïalang kaba kine ki ‘riew rangbah ki ïakynduh, ki la ïathuh ba katei ka jingïakynduh ka dei ha kine ki sngi ha Shillong.
Ki la ïathuh ba kitei ki ‘riew rangbah ki dei ki nongtrei jong ka Voice of the People Party kiba la wan na Jaiñtia, West Khasi Hills, Jaïaw, Mawlai bad kiwei de ki bynta.
Ki la ïathuh ba katei ka durkhih kaba la saphriang ka long tang ban pyni tiak sha ki paidbah shwa ba ka durkhih kaba bun kan mih ha kine ki sngi ban wan.
