Seoul, Rymphang:
Ka kompeni liengsuin na Korea kaba tip kyrteng kum ka Korean Air ka la shah jied kum ka kompeni liengsuiñ kaba bha tam na ka bynta u snem 2025, da kaba iehnoh ïa ka nam lahduh kaba mynshwa ka Qatar Airways. Ha ka jingkheiñ man la u snem ïa ki kompeni liengsuiñ kiba bha tam ha kylleng ka pyrthei, ka AirlineRatings.com, ka la pynpaw ïa ka jingpynleit jingmut jong ka Korean Air halor ka jingshngaiñ jong ki nongleit nongwan, khamtam ha ka kyrdan (class) kiba kham duna ha ka ïoh ka kot (Economy Class), kaba la pynlong ba kan ioh ïa ka kyrdan ba ha khlieh duh.
Ïa ka jingthew la buh katkum ka jing-ai jingmut na ki nongleit jingleit, ki jingbishar bniah jong ki nongkhmih bniah ba tbit, ka jingjied ïa ki mar baroh kawei bad ka jinglong lah ban ïaishah na ka bynta ki nongleit nongwan, ka jingpynthymmai, bad ki jingbthah ïa ki lieng kiba shakhmat.
Katkum ka kot ba pawnam jong ka jingleit jingwan, ym kum kiba bun kiwei pat ki kompeni, ka kompeni liengsuiñ ka la pynneh ïa ki jaka shong kaba long 33-34 inshi ha ki liengsuiñ kiba heh ka met. Ka la kyntait ban pynduna ïa ka jingbun ki jaka shong, kaba pynthikna ïa ka jingleit kaba kham suk.
“Katba bun ki kompeni liengsuiñ ki la pyndap ïa ka jaka shong kaba 10 ha kawei ka laiñ ha ki liengsuiñ 777 bad pynduna ïa ka jaka shong ha ka kyrdan jong ka klas ki ba kham duna ha ka ïoh ka kot sha ka 31 haduh 32 inshi (kaba la hiar na ka 32 haduh 33 inshi mynshwa), ka Korean Air ka la jied ban nym bud ïa kane ka jinglong,” ong ka CEO jong ka AirlineRatings.com ka Sharon Petersen.
Ka jingbishar bniah ka la pynpaw ruh ïa ka jingjied ba bniah jong ka Korean Air ïa ki jingpynbyrngia hapoh liengsuiñ, ka jingpynbha ha ki jingbam, bad kynthup ïa baroh ki jingdonkam ha ki jingleit ba jngai jong ka.
Ka jingdon jong kane ka kompeni liengsuiñ ha ka kyrdan ba ha khlieh duh la pynshong nongrim ruh ha ka jingïasoh jong ka dang shen bad ka Asiana Airlines, kaba dei ka jingpynïasoh kaba heh tam ha ka histori jong ka Asia.
Ka Air New Zealand ka la wan ha ka kyrdan kaba lai katba ka Cathay Pacific ka la wan ha ka kyrdan kaba saw.
Ki 25 tylli ki kompeni liengsuiñ kiba pawnam ki pyndep ïa ki kyndon, kynthup ïa ka jingai ïa ki jingshakri ba pura bad ban don ïa ki jaka shong ka jaka shong ha ka kyrdan jong ka klas ki ba kham duna ha ka ïoh ka kot kiba ka jingjrong kaba rit tam ka long 31 inshi.
