Nongstoiñ, Rymphang 14
Sa tang katto-katne sngi ba ki paidbah nongshong shnong kin sa ïoh ban pyndep ïa ka jingjied nongmihkhmat sha KHADC na la ki jong ki jong ki konstitwensi, ki kyrtong bad ki nongïalam jong ki seng bapher-bapher ruh ki la nang pynjur ban pynpaw bad pynsngew ïa la ki nia ki jutang sha ki paidbah da ka jingthmu ban ïoh ïa ka jingkyrshan.
Haba phai sha Mawshynrut konstitwensi, ha ka Sngi Thohdieng la sakhi ruh ba nalor kiwei pat ki seng kiba la ïeng ha ka rynsan ban ïalap ïa ka ilekshon ha Riangdo, ki ar tylli ki seng kiba donlang ha ka Sorkar kaba mynta ba kynthup ïa ka HSPDP bad ka NPP ki la ïa pyni ïa ka jingbun paid ha kaba ki paidbah jong kine ki seng da ki spah ngut ki la wan ban ai ka jingkyrshan ïa la ka jong ka seng.
Haba kren ha katei ka rynsan ïalap ilekshon, u Bah Kodang Rashir, kyrtong ka Congress u la ong ba kumba long mynta, haba jied ïa u kyrtong, la shu jied madei-mata khlem da pyrkhat la u ne ka briew ki long kiba kumno bad la ki lah ne em ban ïasaid ïa ki jingdonkam u paidbah hynrei bunsien la klet noh namar ka jingshah pynbiej ha ka pisa.
U la ong ba ki don ruh kiba kwah ban ïakhun kum ki kyrtong tang ban ïoh ïa ka nam ka burom, ïalade ki kwah ban thied ïa paidbah da ka pisa namar katta ka donkam ïa ki paidbah ba kin pyrkhat shuwa ban thep ïa ka ‘vote’ ban jied ïa uba kumno.
“Nga sngewthuh biang-biang ka Mawshynrut kam dei shuh ka konstitwensi kaba dang biej, wat nym biej ïa ka pisa. Nga te ïalade nga dei u kyrtong uba duk na kiba duk tam hynrei nga ‘riewspah ha ka mynsiem bad don ki kyrtong kiba kwah ban shong ha ïingdorbar tang namar ki kwah ïa ka nam ka burom hynrei ïa ka jingeh jong u paidbah kim tip bad ki shuh kwah tang ban ‘riewspah ïalade ” ong u Bah Kodang.
U Bah Sranly Rongrin, kyrtong ka UDP pat u la ong ba ka thong ka jong u hi lada ki paidbah kin jied ïa u ka long ba u kwah ba u don ka mynsiem ban trei da kaba khuid kaba suba ym tang da kaba heh tang da ka tyngam hynrei un leh da ka kam .
U Bah Kardinal Sohshang, kyrtong ka NPP u la ong ba keiñ nioh ïa ka jingpyrta ieid ri tang ha ki por ilekshon, ki seng ki bapher-bapher ki kren ha kaba ïadei bad ka ilekshon khamtam ha u snem 2023 da ka ong ba ka seng kaba kumta kaba kumta, ki nongïalam kiba la rai kut rai dam ban kiar ïa ka NPP ha kaba kut ka long hadien ar sngi puk sha ka NPP.
U Bah Kardinal u la ong ruh ba long katba long lada kim mon ïa ka NPP, hynrei kin jied ïa u Bah Kardinal – lada kim mon ïa ka seng, kata jied ïa u briew namar ka seng kam don eiei lada u briew um treikam.
U Bah Srally Rashir, kyrtong ka HSPDP pat u la pynpaw da kaba ong, “Ngan trei katba lah lada phi ai biang ïa nga ka bor ban long u MDC bad kata ka dei ka jingkwah ka jong nga bad ka seng “.
Shuh shuh u la ong ba u la long teng kum u MDC bad u la bat bun ki kam hapoh ka Council, kumta kum ki paidbah kim sngew phylla shuh bad kum ki paidbah kin ai bad jied biang ïa u sa shisien bad katba lah un shakri na ka bynta ki paidbah hapoh ka konstitwensi.
