Nongpoh, Rymphang 14
Ki bor pulit jong ka Ri Bhoi District hadien ka jingïoh jingtip kaba thikna halor ka jingdon jong ki briew kiba suba khaïi drok, hynnin ka janmiet ki la pynlong ïa ka jingkhynra ha ki bynta jong ka shnong Umshangling, Nongpoh bad ïoh ban bat ïa san ngut ki samla kiba la suba donkti.
Haba kren sha ki lad pathai khubor, u Bah Jason Mairom, Additional Superintendent of Police ka Ri Bhoi District u la pyntip kitei baroh san ngut ki samla kiba la ïoh bat hynnin ka janmiet ki dei ki khynnah trai shnong. Na ka met jong kine la ïoh ban kurup tang ïa ki thyrnia injek kaba pyni shai ba ki dei ki briew kiba donkti pyndonkam ïa u drok.
U Bah Mairom u la ïathuh ruh na ka liang ki bor pulit ki la ai da ka counselling ia kitei ki san ngut ki samla ba kin lah ban lait noh na u drok ha ryngkat ka jingdonlang jong ki bahaing bad pyntip ruh ba kino-kino ki samla kiba la ngop bad kwah ban lait na u drok, ki lah ban leit pan jingiarap na ka One Stop Center kaba don marjan bad ka ophis u Deputy Commissioner ka Ri Bhoi lane sha ki bor pulit bad ruh sha ka Social Welfare Department.
Shuh shuh, na ka liang u Bah Mairom u la maham ruh ïa kito ki briew kiba donkti ban pynjot ïa ki khun samla da kaba shalan beaiñ ïa u drok ba ki khmat jong ki bor pulit ki peit kliaw sha ki bad kin ngat ha ki kyndon jong ka aiñ.
