Tura, Rymphang 14
Haba ïadei bad ka jingwan rung be-aiñ jong ki nong Bangladesh shapoh ka Jylla, ki bor pahara ki la kem ïa 14 ngut ki bar-ri ha ryngkat 3 ngut ki nongkhaïi ha ki 2 tylli ki jingjia bapher-bapher ha ka Sngi Palei ha West Garo Hills.
Katba ha kawei ka jingjia, ki BSF, CRPF bad ki pulit ka distrik ki la kem noh ïa 8 ngut ki nong Bangladesh ha ryngkat uwei u nongkhaïi na West Bengal hynnin ka janmiet, ha ka por kumba 6:30 baje eiei hajan ka Madan ïalehkai Chandmary ha Tura, sa 6 ngut kiwei pat kiba dei ki nong Bangladesh ryngkat bad 2 ngut kiwei pat ki nongkhaïi na India ki la shah bat ha ki bor pahara khappud katba ki dang pyrshang ban leit phai be-aiñ sha la ri ha ryngkat ka jingïarap jong 2 ngut ki nong India.
Ha katei ka jingjia kaba la jia ha Tura, ki shipai BSF ryngkat ki pulit ka distrik bad ki pulit CRPF ki la bat ïa 8 ngut ki nong Bangladesh ryngkat uwei u nong India (u nongñiah) kiba shong da ka kali ‘Innova’ (AS-01-GC-7050) hajan ka Madan ïalehkai Chandmary ha Tura, ha surokbah NH-51.
Kitei ki nong Bangladesh kiba la shah kem ki dei ba la tip kyrteng kum u Sahan Sardar, Md Habibul Rahman (24 snem ka rta), Sahidul Islam (50 snem ka rta), Md Milon (23 snem ka rta), Azgar Gazi (28 snem ka rta), Md Sohel (28 snem ka rta), Almamun (28 snem ka rta) bad Md Tuhin (26 snem ka rta). Utei u nongñiah kali uba na India, u dei ba la tip kyrteng kum u Abhijit Das (25 snem ka rta), na ka Alipurduar distrik, West Bengal.
Ha kawei pat ka jingjia, ki shipai BSF ki la kem sa 6 ngut ki nong Bangladesh ryngkat 2 ngut ki nong India hajan khappud. Ïa kine ki jingkhynra la pynlong kum shi bynta jong ka jingpyrshang ki shipai BSF Meghalaya (kaba dang ïaid) ban khanglad ïa ka jingwan rung be-aiñ bad kiwei-kiwei ki kam sniew sha shiliang khappud.
“Ha ka jingïaid jong ki jingkhynra, ki shipai BSF kiba peitngor ha Tura bad ka 4th BN ki la lap ïa ka ïaid ka ïeng kaba suba ha shi lynter khappud bad kumta ki la shimkhia mardor, kaba la ïalam pat sha ka jingshah kem jong 14 ngut ki nong Bangladesh bad 3 ngut ki nong India. Hadien kata, la aiti noh ïa kine kiba shah kem sha ka thanat ba dei khmih na ka bynta ki kam ba ïadei bad ka aiñ,” ong ka kyrwoh na ka BSF.
Hadien ba la tohkit, kitei ki nong Bangladesh ki la phla ba ki la ju trei kum ki nongsuh jaiñ bad nongbylla ha ki kompeni suh jaiñ ha Tirupur, Tamil Nadu bad ki la rung be-aiñ sha India dang katto-katne bnai mynshuwa. Ka jingpyrshang jong ki ban leit phai sha Bangladesh lyngba ki lad ki lynti ki bym dei katkum ka aiñ ka la pulom noh namar ka jinglong husiar bad ka jinglong la kloi ban shimkhia jong ki shipai BSF.
Ki jingjia kiba dang shen halor ka jingrung jingmih be-aiñ jong ki nong Bangladesh, ba la ïarap da ki nongkhaïi na India ka la wanrah ka jingsngewkhia kaba jur hapdeng ki nongshong shnong. Tang ha ka taïew ba la dep, sa kawei pat ka kynhun jong 12 ngut ki nong Bangladesh ryngkat uwei pat u nongkhaïi ki la shah kem hadien ka jingtip shaphang ka jingrung jong ki hajan ka shnong Hallidayganj ha WGH.
Ka jingshah kem ba mynta jong 14 ngut ki nong Bangladesh ka la pynkiew ïa ka jingkheiñ kaba mynta ka la palat ïa ka 50 ngut tang ha ka distrik jong ka WGH, mynta u snem.
Hadien ka kynrum-kynram ha Bangladesh naduh ka jingshah pynhiar shuki ka Sheikh Hasina, palat 200 ngut ki briew na Bangladesh ki la shah kem tang ha Ri-lum Garo ha ki saw bnai khatduh jong u snem ba la dep.
