Shillong, Rymphang 16
Ka lympung ïalehkai Super Division Cricket League 2024-25 ba la pynïaid da ka Shillong Cricket Association ka la nangjam shaphrang ha kaba ka Raj Bhawan ka la ïoh jingjop hadien ba ka la lah ban pynliem noh ïa ka NFU da 6 wiket ha ka Sngi U Blei ha madan Polo.
Ha kane ka jingïa-khun ka NFU ka la kam trai ban tied nyngkong ha kaba ka la ïoh 159 run bad shah pynhap 10 wiket ha ki 43 over. U Ayushman Das u la tied 37 run na ki 72 bol bad u Shubham Rasaily u la ïoh 28 run na ki 56 bol. Katba u Andrew Ropmay u la shim 4 wiket bad 3 wiket da u Arbin Singh na ka bynta ka Raj Bhavan.
Haba wan shimti ïa ka pali ba ar, ka Raj Bhawan ka la lah ban kynjoh sha ka thong da kaba ïoh 163 run bad shah pynhap 4 wiket ha ki 35 over. U Joydeepan Deb (not out) u la khyrwit ïa ka shiteng spah kaba 54 runs na ki 61 bol bad u Andrew Ropmay u la ïoh 53 run na ki 66 bol. Katba u Akash bad u Hasin ki la shim mar shi wiket na ka bynta ka NFU. Ïa ka nam Man of the Match la ïohpdiang da u Andrew Ropmay uba la tied 53 run bad shim 4 wiket.
