Shillong, Rymphang 16
Ka Jylla ka la lah ban khur san tylli ki takma ha ka 38th National Games 2025 kaba la poi sha kaba kut ha ka sngi Thohdieng ha Uttara-khand. Pynbna ka la wan ha ka kyrdan 30 napdeng ki jylla jong ka ri India kiba ïashim bynta ha kane ka lympung.
Kane ka lympung kaba la neh haduh shiteng bnai kynthih, ka Meghalaya ka la khur kawei ka takma ksiar bad ar tylli ki takma rupa bad kawei ka rnong kiba la wan urlong lyngba ki nongking lieng hapoh ka lama jong ka Meghalaya Canoe Association bad kawei pat takma rnong ka la wan na ka Rowing Association ha ka Women Double Scull Competition. Kane ka long hadien 14 snem ba ka la shim bynta ha kane ka lympung.
Ym lah ban len ba ha kane ka lympung, ka Jylla ka la lah ban sei haduh 41 ngut ki nongïalehkai ha ki khyndai tylli ki jait jingïalehkai kiba kynthup ïa ka Shooting (7), Athletics (1), Judo (2), Archery (1), Rowing (17), Wushu (2), Aquatics (4), Canoeing & Kayaking (4) bad Boxing (3), hynrei tang hynriew ngut kiba la lah ban wanrah burom ïa ka Jylla.
Kumba ka paw ka Meghalaya Canoe Associa -tion ka dei kaba dang shu mih dangshen hadien ba la seng ïa ka ha u snem 2023 da ki shi kurim kata u Ian Stuart Vincent uba na Australia bad ka Sheila Vincent. Pynban ki la lah ban sei ïa ki nongïalehkai kiba kynsai kiba la lah ban khur takma baroh saw ngut.
Haba phai sha kiwei ki jait jingïalehkai kiba kynthup ïa ka ka Shooting, Athletics, Judo, Archery, Wushu, Aquatics bad ka Boxing ki dei kiba la long doh long snam hapoh ka Jylla da bun snem bad kiba la ju ïashim bynta ha kiba bun ki lympung ïalehkai kiba la long hapoh ka ri, hynrei kaba pyndiaw mynsiem ka long ba na kine ki jingïalehkai ym shym la don kiba lah ban khur takma.
Halor kane ka jingbym lah ban khur takma kine ki jingïalehkai, ka jingkylli kaba la mih na kiba bun ka long hato dei ka jingbym shim khia ki coach ne ki nongïalehkai ne kiei ki jingduna ba kum ki nongïalehkai ki ïakynduh?
Dangshen na ka liang u General Secretary ka Meghalaya State Olympic Association (MSOA) u Bah Finely Lad Pariat u la pynpaw ba na ka liang ka Sorkar Jylla naduh u snem 2022 ka la theh ki lad jingïarap na ka bynta ki nongïalehkai da kaba sam ïa ki baibam (scholarship) bad ki stipend kiba manla u snem halor ki jingjop jong ki.
Hynrei mynta ka Jylla kan pynkhreh ban pynlong ïa ka 39th National Games ka ban long ha u snem 2027 bad mynta ka dangsah sa tang ar snem. Ka jingkylli kaba mih ka long la hato kaei kaba ki coach, ki nongïalehkai kin leh bad haduh katno ba ka Sorkar ka la long ba la khreh ym tang ban pynbiang tang ïa ki jaka ïalehkai kiba paka, hynrei na ka bynta ban sei ïa ki nongïalehkai kiba kynsai khamtam na ki jait jingïalehkai kiba la longdoh long snam da ki phew snem bad ym tang ban shu khmih lynti tang na ki nongking-lieng.
