New Delhi, Rymphang 16 (UNI)
Ka jingïap briew ha ka jingjia shah ïuh kaba la jia ha steshon rel ka New Delhi ka la kiew sha 18 ngut ha kaba 12 ngut kiwei pat ki la ngat ha ki jingmynsaw bapher-bapher, ong u ophisar ka jaka sumar, ha ka Sngi U Blei.
Napdeng kiba ïap, ki don 5 ngut ki khynnah bad 11 ngut ki kynthei, ong u Chief Casualty Medical Officer ka LNJP Hospital.
“Ka jingdon jong kiba ïap ka long 18 ngut. Ka kynthup ïa 5 ngut ki khynnah bad 11 ngut ki kynthei. 12 ngut kiwei pat ki don ïa ki jingmynsaw bapher bapher,” ong utei u ophisar.
Ka tnat rel ka la pynbna ïa ka bai lutksan kaba mar T.10 lak sha ki bahaïing jong ki briew kiba la duh noh ïa la ka jingim. Kiba mynsaw jur kin ïoh ïa ka bai lutksan kaba mar T.2.5 lak, katba kito kiba mynsaw malu-mala kin ïoh T.1 lak.
U CPRO ka Northern Railway, u Himanshu Shekhar Upadhyay u la ïathuh ba ka jingtohkit kaba ha khlieh duh ka la ïaid shakhmat halor kane ka jingjia kaba la jia ha ka miet Sngi Saitjaiñ. Ka jinglong-jingman mynta ka la wanphai biang kumba ju long.
“Ha ka por ba jia katei ka jingjia, ka Magadh Express kaba leit sha Patna, ka la ïeng ha ka rynsan 14 bad ka Uttar Sampark kranti Express kaba leit sha Jammu, ka la ïeng ha ka rynsan 15,” u la ong.
U Himanshu u la ong ba katei ka jingjia ka la jia ha ka por ba katto-katne ngut ki nongleit-nongwan ki la btuit ha ki jingkiew kiba ïalam na ka jingkieng ïaid kjat sha ka rynsan, bad ki nongleit-nongwan kiba bud ïa ki, ki la ngat ha ka jingshah ïuh.
Katei ka jinglong-jingman, ka dei na ka daw jong ka jingïatuid kaba jur jong ki paid nongleit-nongwan kiba la poi ha katei ka steshon ban kiew ïa ki rel ba kyrpang, na bynta ka Maha Kumbh ha Prayagraj.
Hashuwa, u Myntri Rangbahduh ka ri, u Narendra Modi u la pynpaw ïa ka jingsngewsih halor katei ka jingjia ha ‘X’.
U la ong, “Nga sngewsih namar ka jingjia ha ka steshon rel New Delhi. Ki jingpyrkhat jong nga ki don bad baroh kito kiba la duh noh ïa kiba ieid ba thoiñ jong ki. Nga duwai ba kiba mynsaw kin ïoh ïa ka jingkoit jingkhiah kaba kloi. Ki bor pynïaid ki dang ïarap ïa baroh kito kiba la shah ktah ha kane ka jingjia.”
