Agartala, Rymphang:
U Myntri Rangbah ka Tripura, u Manik Saha, u la pynpaw ïa ka jingjulor kaba jur bha kaba la mih na ka jingshlei um kaba la pynjot ha u snem ba la dep, kaba la antad ba ka jingduhnong ka la poi sha ka T.15,000 klur.
U Saha u la ai khublei ïa ka jingkyrshan jong ka Centre ha ka por ba jur ka jingshlei um, kynthup ïa ka jingpynpoi ïa ki kynhun jong ki shipai jong ka ri bad ki liengsuiñ.
“Halor ka jingkyrpad jong ngi, ka Centre ka la phah ïa ka kynhun hapdeng ki myntri ar sien ban bishar bniah ïa ka jingjulor na ka jingshlei um. Kine ki jingpyrshang ki long kiba kongsan bha namar ka jingshlei um ka la pynjot ïa ki mar ki mata bad ki jingtei kiba shongdor T.15,000 klur,” u la ong.
Ban sdang noh mardor ïa ki kam pynbha pat, ka sorkar jylla ka la mang pisa T.563 klur na ka mang tyngka jong ka hi.
U myntri rangbah u la pynpaw ka jingkyrmen ba ka sorkar pdeng kan ai ïa ka pisa kaba donkam na ka bynta ban bteng ban pynbha pat, da kaba bud ïa ki rukom treikam kiba biang.
Ka jingshlei um, kaba la jia ha Tripura ha u Nailar bad Nailur jong u snem ba la dep, ka la wanrah ïa ka jingduhnong kaba sngewsih ïa ki 38 tylli ki mynsiem briew bad ka la ktah ïa kumba 17 lak ngut ki briew.
Kum ka jubab, ka sorkar jylla ka la thaw 889 tylli ki jaka ai jingïarap ban pynsah ïa ki 4 lak ngut ki briew kiba la shah pynkynriah jaka namar ka jingshlei um.
U Saha u la ban jur ïa ka jingdonkam kyrkieh ban pynbha bad pynthymmai hadien ka jingshlei um ban tei pat ïa ki jaka ba shah ktah bad ban kyrshan ïa ki nongshong shnong jong ka jylla ha ka jingkoit jingkhiah jong ki.
